Íslenska kvennalandsliðið í handknattleik kom í kvöld til Zrenjanin í Serbíu þar sem það mætir serbneska landsliðinu í úrslitaleik um farseðil á Evrópumeistaramótið sem fram fer í nóvember.
Lagt var af stað um miðja nótt frá Laugardal til Keflavíkurflugvallar þaðan sem flogið var til Zürich og áfram til Belgrad. Á flugvellinum í Belgrad beið íslenska hópsins langferðabifreið sem flutti hann til Zrenjanin, 75 mínútna akstursleið norður frá Belgrad. Ekið var í lögreglufylgd.
Eftir að leikmenn, þjálfarar og starfsmenn höfðu komið sér fyrir á Hótel Vojvodina í Zrenjanin var nærst og aðeins rölt í kringum hótelið til liðkunar eftir langar setur dagsins.
Hafist verður handa við undirbúning í fyrramálið eftir að leikmenn hafa hvílst vel. Fundað verður og æft í keppnishöllinni í Zrenjanin um miðjan daginn, um líkt leyti og viðureignin hefst á laugardaginn. Flautað verður til leiks klukkan 16.
Leikmennirnir sextán sem tóku þátt í leiknum við Svía í gærkvöld á Ásvöllum eru í Zrenjanin auk Margrétar Einarsdóttur, markvarðar Hauka, sem bættist í hópinn seint í gærkvöld eins og handbolta.is greindi frá í morgun.
Íslenska liðið þarf á sigri að halda í leiknum á laugardaginn. Serbum nægir annað stigið þar sem lið þeirra er tveimur stigum á undan eftir fimm umferðir í 6. riðli undankeppninnar. Íslenska landsliðið vann fyrri viðureignina sem fram fór á Ásvöllum í október, 23:21.
Handbolti.is slóst í för með íslenska landsliðinu til Zrenjanin.
