Handknattleiksdeild Hauka tilkynnti í kvöld að Maksim Akbachev hafi verið ráðinn aðstoðarþjálfari meistaraflokks karla og hefur hann þegar tekið til óspillra málanna.
Maksim kemur í stað Vignis Svavarssonar sem látið hefur af störfum vegna anna á öðrum vettvangi. Vignir kom inn í starfið hjá Haukum á nýjan leik fyrir 11 mánuðum þegar Ásgeir Örn Hallgrímsson tók við þjálfun Hauka af Rúnari Sigtryggssyni.
Maksim hefur undanfarið hálft ár verið aðalþjálfari 19 ára landsliðs Barein með góðum árangri. Þar áður var hann yfirþjálfari yngri flokka og aðstoðarþjálfari meistaraflokksliðs karla hjá Gróttu. Maksim er öllum hnútum kunnugur hjá Haukum þar sem hann var aðstoðarþjálfari kalaliðsins við hlið Gunnars Magnússonar frá 2017 til 2020.
„Ég er mjög ángæður að vera kominn aftur til Hauka. Haukar bjóða uppá frábært handbolta umhverfi og hér er allt til alls til að ná árangri,” er haft eftir Maksim í tilkynningu Hauka sem send var út í kvöld á sama tíma og þrír leikir fara fram í Olísdeild karla.
