Mál „tiltekins aðila“ á vegum handknattleiksliðs Harðar er til sérstakrar skoðunar þessa dagana samkvæmt því sem fram kemur í úrskurði aganefndar HSÍ í vikunni og birtur er á vef sambandsins.
Ástæða fyrir skoðuninni er að aganefnd barst skýrsla frá dómurum leiks Kórdrengja og Harðar í bikarkeppni karla, er fram fór 16. desember á Ásvöllum, vegna framkomu þessa „tiltekna aðila“ sem svo er nefndur. Mun hegðun hans og framkoma hafa verið með slíkum ólíkindum að dómarar sáu sig tilneydda til þess að vísa „tiltekna aðilanum“ út úr húsi.
Hörður vann leikinn með yfirburðum og tryggði sér sæti í átta liða úrslitum bikarkeppninnar í fyrsta sinn.
Vítaverð eða hættuleg framkoma
„Í 17. gr. reglugerðar HSÍ um agamál kemur fram að „ef áhorfendur, þar með taldir forystumenn félaga, gerast sekir um vítaverða eða hættulega framkomu gagnvart leikmönnum, dómurum eða starfsmönnum leiks, er aganefnd heimilt að sekta viðkomandi félag þar sem leikurinn fer fram sem og gestaliðið í sérstökum tilvikum.
Með vísan til 4. mgr. 17. gr. reglugerðar HSÍ um agamál, mun aganefnd óska umsagnar Harðar, áður en úrskurðar verður um viðurlög. Máli þessu er frestað til næsta fundar aganefndar,“ segir orðrétt í úrskurði aganefndar sem birtur var í gær.
Ekki farið yfir strikið í fyrsta sinn
Þetta er ekki fyrsta sinn sem maður á vegum Harðar lætur kappið bera sig algjörlega ofurliði. Í tvígang á síðasta keppnistímabili var handknattleiksdeild Harðar sektuð fyrir framkomu manns á hennar vegum. Í fyrra skiptið var deildin sektuð um 25 þúsund krónur vegna orðháks sem fór yfir strikið og í síðara sinnið um 100 þúsund eftir að manni á vegum deildarinnar var að beiðni dómara vísað út úr húsi meðan kappleikur stóð yfir.
Hörður sektaður vegna „vítaverðrar framkomu“ orðháks
Hörður sektaður um 100 þúsund vegna hegðunar áhorfenda
Þrír voru útilokaðir
Fast virðist hafa verið tekist á innan vallar á Ásvöllum því þrír leikmenn voru útilokaðir með skýrslu. Tveir liðsmenn Kórdrengja, Edidijus Mikalonis og Gunnar Valur Arason, auk José Esteves Lopes Neto liðsmanns Harðar.
Allir sluppu þeir við leikbann eins og kemur fram í fyrrgreindum úrskurði aganefndar sem virðist hafa verið komin í jólaskap þrátt fyrir mál „tiltekna aðilans“ en nokkur mál til viðbótar voru afgreidd með þessum orðum; „er það niðurstaða aganefndar að ekki skuli aðhafst frekar vegna málsins. Aganefnd vekur þó athygli á stighækkandi áhrifum útlokana vegna slíkra brota.“
Úrskurður aganefndar HSÍ 20. desmber 2022.
