„Það ríkir mikil eftirvænting og allir svo sannarlega glaðir að vera hérna,” sagði Arnór Atlason, aðstoðarþjálfari danska meistaraliðsins Aalborg Håndbold. Arnór er staddur í Köln þar sem liðið tekur þátt í úrslitahelgi Meistaradeildarinnar í handknattleik karla á morgun og á sunnudag.
Þetta er í fyrsta sinn sem Aalborg-liðið nær svo langt í keppninni, að vera á meðal fjögurra bestu í Evrópu. Gengi liðsins hefur verið ævintýri líkast. Fyrir utan afar góðan árangur í riðlakeppninni í vetur þar sem Aalborg vann m.a. Veszprém í Ungverjalandi þá sló Aalborg lið Porto út í 16-liða úrslitum og efsta lið þýsku 1. deildarinnar, Flensburg, í átta liða úrslitum keppninnar.
Framundan er leikur í undanúrslitum við franska meistaraliðið PSG klukkan 13.15 á morgun í Lanxess-Arena í Köln. Eftir því sem næsta er komist verður hægt að fylgjast með beinni útsendingu frá leikjum úrslitahelgar Meistaradeildarinnar í útsendingu Viaplay.
Höfum sýnt að ýmislegt er hægt
„Staðreyndin um að við eru hér vitnar um að við séum búnir að eiga frábært tímabil. Við ætlum að selja okkur dýrt á laugardaginn en erum vel meðvitaðir um að við erum að fara að mæta algeru klassaliði og það þarf sennilega allt að ganga upp til að við förum áfram. En við höfum sýnt það i vetur að það er ýmislegt mögulegt og oft hafa óvæntir hlutir gerst hér í Köln,“ sagði Arnór ennfremur þegar handbolti.is heyrði stuttlega í honum hljóðið í gærkvöld.
Hefur áður verið með
Aalborg er annað danska liðið sem tekur þátt í úrslitahelgi Meistaradeildarinnar síðan hún var sett á fót 2010. AG Köbenhavn náði í undanúrslit vorið 2012. Arnór var einn fjögurra Íslendinga í því stórliði sem tók þá þátt í handboltahátíðinni í Lanxess-Arena íþrótta-, og sýningarhöllinni glæsilegu í Köln.
Aron með Barcelona
Í hinni viðureign undanúrslitanna eigast við Barcelona og franska liðið Nantes. Aron Pálmarsson leikur með Barcelona. Hann flytur sig um set í sumar og verður liðsmaður Aalborg Håndbold frá og með næsta keppnistímabili. Leikur Barcelona og Nantes byrjar klukkan 16.
Úrslitaleikur Meistaradeildarinnar fer fram á sunnudaginn klukkan 16. Þá verður leikurinn um bronsið um garð genginn en reiknað er með að hann hefjist klukkan 13.15.
