Danmerkurmeistarar Aalborg leika til úrslita um danska meistaratitilinn eftir að hafa lagt Viktor Gísla Hallgrímsson og félaga í GOG, 33:30, í Álaborg í kvöld í síðari undanúrslitaleik liðanna. Arnór Atlason er aðstoðarþjálfari Aalborg.
Aalborg mætir Bjerringbro/Silkeborg í úrslitaleikjum heima og að heiman.
Óðinn Þór Ríkharðsson og samherjar í Holstebro leika við GOG um bronsverðlaunin. Holstebro tapaði fyrr í kvöld í Silkeborg, 30:25. Það verður sem sagt Íslendingaslagur um bronsið.
Viktor Gísli varði vel í marki GOG í kvöld, alls 17 skot, þar af tvö vítaköst. Þetta lagði sig út á 35% hlutfallsmarkvörslu. Mathias Gidsel skoraði níu mörk fyrir GOG. Lukas Sandell skoraði átta fyrir Aalborg og var markahæstur.
Ekki hefur verið tilkynnt hvenær úrslitaeinvígin hefjast.
Aalborg hefur orðið meistari í þrígang á síðustu fjórum árum.
Bjerringbro/Silkeborg hefur einu sinni unnið danska meistaratitilinn, fyrir fimm árum.
Eins og sjá má á myndskeiðinu hér fyrir neðan voru margir áhorfendur á leiknum í Gigantium í Álaborg í kvöld og fögnuðu flestir þeirra ákaft í leikslok.
