Íslandsmeistarar ÍBV urðu fyrstir til þess að vinna Val í Olísdeild karla á keppnistímabilinu í Vestmannaeyjum í dag, 38:34, eftir að hafa verið tveimur mörkum yfir að loknum fyrri hálfleik, 20:18. Valsmenn halda áfram efsta sæti deildarinnar með 12 stig eftir sjö leiki. ÍBV færðist upp að hlið Aftureldingar í fjórða til fimmta sæti með níu stig. Hafnarfjarðarliðin FH og Haukar eru einu og tveimur stigum á eftir Val. Aukin spenna er þar með hlaupin í toppbaráttuna.
Eins og áður segir var ÍBV með tveggja marka forskot í hálfleik, 20:18. Val tókst að minnka muninn í eitt mark, 22:21, þegar tíu mínútur voru liðnar af síðari hálfleik. Nær komust Valsmenn ekki. ÍBV hélt tveggja til þriggja marka forskoti í þessum hraða leik sem skoruð voru 72 mörk.
Valur varð fyrir áfalli um miðjan fyrri hálfleik þegar Benedikt Gunnar Óskarsson fékk rautt spjald fyrir að hindra Gauta Gunnarsson í hraðaupphlaupi. Anton Gylfi Pálsson og Jónas Elíasson dómarar voru ekki í vafa.
Elmar Erlingsson og Dagur Arnarsson áttu fimm stoðsendingar hvor og Danjál Ragnarsson var með sex sköpuð færi, þar af fjórar stoðsendingar. Hjá Valsmönnum var Aron Dagur Pálsson með sjö sköpuð færi, þar af sex stoðsendingar samkvæmt tölfræði HBStatz.
Staðan og næstu leikir í Olísdeildum.
Mörk ÍBV: Elmar Erlingsson 7/4, Daniel Vieira 7, Breki Þór Óðinsson 6, Kári Kristján Kristjánsson 5, Dánjal Ragnarsson 3, Sigtryggur Daði Rúnarsson 3, Gabríel Martinez Róbertsson 3, Dagur Arnarsson 2, Gauti Gunnarsson 2.
Varin skot: Petar Jokanovic 7, 28% – Pavel Miskevich 5, 25%.
Mörk Vals: Róbert Aron Hostert 6, Aron Dagur Pálsson 5, Alexander Peterson 5, Andri Finnsson 4, Ísak Gústafsson 3, Benedikt Gunnar Óskarsson 3/3, Magnús Óli Magnússon 3, Allan Norðberg 2, Tjörvi Týr Gíslason 2, Úlfar Páll Monsi Þórðarson 1.
Varin skot: Björgvin Páll Gústavsson 7/1, 17,5% – Stefán Pétursson 1, 16,7%.
