Íslandsmeistarar ÍBV fóru vel af stað í upphafsleik sínum í Olísdeild karla í handknattleik í kvöld sem um leið var síðasti leikur 1. umferðar. Eyjamenn mættu í Garðabæ og eftir erfiðar fyrstu 20 mínútur leiksins þá tóku þeir völdin í leiknum og léku eins og sá sem valdið hefur í 40 mínútur. Niðurstaðan var níu marka sigur, 33:24. Stjarnan var marki yfir í hálfleik, 14:13.
Stjarnan fór frábærlega af stað og var með sex marka forskot, 12:6, þegar um 20 mínútur voru liðnar af leiknum. Sóknarleikur ÍBV slakur og öll stemning með Stjörnumönnum sem léku við hvern sinn fingur. Það átti eftir að breytast skyndilega.
Stjörnumenn töpuðu þræðinum í sóknarleiknum og réðu ekkert við leikmenn ÍBV í sókninnni, ekki síst Elmar Erlingsson sem fór á kostum. Hann skoraði 10 mörk í 11 skotum áður en leikurinn var úti.
Varnarleikur ÍBV var afar góður og jafnt og þétt drógu leikmenn liðsins máttinn úr Stjörnumönnum. Munurinn jókst eftir því sem á síðari hálfleikinn leið og var orðinn 10 mörk rétt fyrir leikslok. ÍBV vann síðustu 40 mínútur leiksins, 27:11.
Sterkur varnarleikur ÍBV varð til þess að liðið fékk mörg hraðaupphlaup og m.a. skoraði Gauti Gunnarsson öll fimm mörk sín í síðari hálfleik eftir slík upphlaup.
Mörk Stjörnunnar: Starri Friðriksson 7/2, Tandri Már Konráðsson 4, Daníel Karl Gunnarsson 4, Pétur Árni Hauksson 3, Benedikt Marinó Herdísarson 2, Hergeir Grímsson 2, Þórður Tandri Ágústsson 1, Egill Magnússon 1.
Varin skot: Sigurður Dan Óskarsson 7/1, 26,9% – Adam Thorstensen 2, 12,5%.
Mörk ÍBV: Elmar Erlingsson 10/2, Daniel Esteves Vieira 5, Gauti Gunnarsson 5, Sveinn Jose Rivera 3, Arnór Viðarsson 3, Sigtryggur Daði Rúnarsson 2, Dagur Arnarsson 2, Hinrik Hugi Heiðarsson 1, Breki Þór Óðinsson 1, Nökkvi Snær Óðinsson 1.
Varin skot: Petar Jokanovic 6, 33,3% – Pavel Miskevich 2, 14,3%.
Handbolti.is var í TM-höllinni og fylgdist með leiknum í textalýsingu hér fyrir neðan.
