Á morgun verður settur í sölu næsti skammtur af aðgöngumiðum á kappleiki Evrópumóts karla í handknattleik sem hefst í Þýskalandi 10. janúar. Þegar hafa selst yfir 250 þúsund aðgöngumiðar, þar af nærri 50 þúsund miðar á upphafsleik mótsins sem leikinn verður á MERKUR Spiel-Arena í Düsseldorf.
M.a. verða síðustu miðarnir á upphafsleik mótsins til sölu frá og með morgundeginum. Einnig miðar á leiki þýska landsliðsins í Mercedes-Benz Arena í Berlín 14. og 16. janúar en heita má að uppselt sé á báða dagana.
Einnig verður mögulegt að fá miða á alla aðra leikstaði mótsins, þar á meðal á leikina í milliriðlakeppninni í Köln þar sem við vonum að íslenska landsliðið verði í baráttunni. Eins verða til sölu miðar á leiki úrslitahelgarinnar í Köln.
Í tilkynningu frá EHF segir að miðasalan verði opnuð klukkan 10 í fyrramálið 13. september, klukkan 12 að mið-evrópskum tíma.
Hlekkir á miðasöluna: https://heretoplay.com/ og https://www.eurohandball.com/all-tickets/
Riðlaskipting og leikstaðir.
- A-riðill: (Düsseldorf/Berlín): Frakkland, Þýskaland, Norður Makedónía, Sviss.
- B-riðill: (Mannheim): Spánn, Austurríki, Króatía, Rúmenía.
- C-riðill: (München): Ísland, Ungverjaland, Serbía, Svartfjallaland.
- D-riðill: (Berlín): Noregur, Slóvenía, Pólland, Færeyjar.
- E-riðill: (Mannheim): Svíþjóð, Holland, Bosnía-Hersegóvína, Georgía.
- F-riðill: (München): Danmörk, Portúgal, Tékkland, Grikkland.
Millriðlakeppnin fer fram í Lanxess-Arena í Köln (A, B, C-riðlar) og Barclays Arena í Hamborg (D, E, F-riðlar).
Eftir því sem handbolti.is kemst næst hafa um 4.000 Íslendingar þegar keypt miða á leiki Evrópumótsins. Aðeins Færeyingar hafa keypt fleiri miða sé miðað við gömlu góðu höfðatöluna.
