Útlit er fyrir að miklar breytingar verði á kvennaliði Stjörnunnar í handknattleik frá lokum þessa tímabils og þangað til það næsta hefst í september. Eftir því sem næst verður komist lék Hanna Guðrún Stefánsdóttir sinn síðasta leik fyrir Stjörnuna í dag. Hún var a.m.k. með blómvönd í TM-höllinni í kvöld eftir að Stjarnan féll úr leik fyrir Val í undanúrslitum. Alla jafna hefur Hönnu Guðrúnu ekki verið afhent blóm eftir leiki Stjörnunnar í vetur þótt e.t.v. hafi verið ástæða til.
Fleiri rifa seglin
Til viðbótar við að hugsanlega er Hanna Guðrún hætt keppni eftir á þriðja áratug í meistaraflokki með Stjörnunni og áður Haukum, herma heimildir handbolta.is að Elísabet Gunnarsdóttir línukona ætli sér að rifa seglin eftir að hafa verið í fremstu röð og árabil, bæði með Stjörnunni og Fram. Svipaða sögu mun vera að segja um Þórhildi Gunnarsdóttur. Hún var reyndar ekki með í mörgum leikjum í vetur. Þórhildur mun hafa í hyggju að hætta.
Útlendingar á förum
Lena Margrét Valdimarsdóttir gengur til liðs við Selfoss eins og sagt var frá á dögunum. Einnig munu erlendu leikmennirnir Britney Cots og Darija Zecevic vera á förum frá Stjörnunni, eftir því sem næst verður komist.
Til viðbótar þá liggur fyrir að Hrannar Guðmundsson þjálfari Stjörnunnar síðasta hálfa annað árið hættir. Sigurgeir Jónsson (Sissi) mun taka við af Hrannari eins og sagt var frá á dögunum.
