- Auglýsing -
- Ágúst Elí Björgvinsson og félagar í Kolding unnu Tönder, 31:24, í dönsku bikarkeppninni í gærkvöld en leikið var á heimavelli Tönder. Þetta var síðasti leikur Ágústs og félaga á leiktíðinni. Bikarkeppninni verður framhaldið í haust en sigurinn í gærkvöld tryggir Kolding sæti í átta liða úrslitum bikarkeppninnar.
- Finnskur vinstri hornamaður, Benjamin Helander, hefur samið við Rhein-Neckar Löwen og kemur til liðs við félagið í sumar. Hann kemur í stað Jerry Tollbring sem rær á önnur mið í sumar. Helander, er 22 ára gamall, og þykir mikið efni. Hann hefur síðustu ár leikið með Alingsås í Svíþjóð. Helander verður fyrsti Finninn til þess að leika með Rhein-Neckar Löwen.
- Staðfest hefur verið að þýski landsliðsmaðurinn Christian Dissinger gengur til liðs við Dinamo Búkarest í Rúmeníu í sumar eftir tveggja ára dvöl hjá Vardar í Norður-Makedóníu.
- Á morgun verður heimilt að selja takmörkuðum fjölda áhorfenda aðgang að handboltaleikjum í Danmörku. Fjöldinn er í hlutfalli við stærð keppnishúsanna en miðað er við að hægt verði að nýta helming af þeim sætum sem fyrir hendi eru á hverjum stað. Áhorfendur hafa ekki mátt sækja kappleiki í Danmörku síðan í lok október þegar 500 manna markið var afnumið og félögum gert að leika fyrir tómum áhorfendapöllum.
- Auglýsing -
