- Auglýsing -
- Ágúst Ingi Óskarsson átti stórleik og skoraði 10 mörk þegar lið hans Neistin tapaði fyrir Kyndli, 24:23, í færeysku úrvalsdeildinni í handknattleik í gær. Felix Már Kjartansson skoraði fjögur mörk og var næst markahæstur liðsmanna Neistans sem er næst neðs í deildinni.
- Heimsmeistarar Dana í handknattleik karla unnu stórsigur á norska landsliðinu, 37:21, í upphafsleik fjögurra liða móts í Gigantium í Álaborg gær. Hvorugt liðanna var skipað allra bestu mönnum sínum en engu að síður kom þessi stóri sigur mörgum í opna skjöldu. Staðan að loknum fyrri hálfleik var 18:12, danska landsliðinu í hag.
- Magnus Bramming, Jacob Lassen og Bjarke Christensen skoruðu fimm mörk hver fyrir danska landsliðið. Christian O’Sullivan var markahæstur Norðmanna með fjögur mörk. Landslið Frakka og Spánverja taka einnig þátt í mótinu.
- Evrópumeistarar Svíþjóðar lögðu Pólverja með þriggja marka mun, 27:24, í æfingaleik í Póllandi í gærkvöld. Pólverjar og Svíar verða sameiginlegir gestgjafar heimsmeistaramótsins í janúar á næsta ári.
- Veselin Vujovic hefur verið ráðinn þjálfari karlalandsliðs Írans í handknattleik. Hann á að búa liðið undir og stjórna því á Asíuleikunum sem fram fara í Japan í september og á heimsmeistaramótinu sem haldið verður í Póllandi og Svíþjóð í janúar á næsta ári. Vujovic var síðast þjálfari Vardar Skopje en hann hætti snemma árs. Svartfellingurinn skapríki hefur marga fjöruna sopið sem þjálfari félagsliða og landsliða um árabil. Vujovic er talinn einn fremsti handknattleiksmaður sem fram hefur komið. Hann var kjölfesta hins sterka júgóslavneska landsliðs á níunda áratug síðustu aldar.
- Sænska landsliðskonan Anna Lagerquist hefur slitið samningi sínum við rússneska meistaraliðið Rostov-Don. Samningur hennar við liðið átti að renna út í lok keppnistímabilsins.
- Stórskyttan Ana Gros leikur með Krim Ljubljana út keppnistímabilið. Hún sagði á dögunum skilið við CSKA í Moskvu.
- Hinn ungi landsliðsþjálfari Bosníu í handknattleik karla, Toni Colina, fékk slæman skell í fyrrakvöld í fyrst leik landsliðsins undir hans stjórn. Bosnía tapað með sjö marka mun, 24:17, fyrir Grikklandi á útivelli. Mikil uppstokkun hefur orðið á landsliði Bosníumanna og margir reyndir leikmenn gefa ekki lengur kost á sér. Colina var aðstoðarmaður forvera síns, Ivica Obrvan. Síðari viðureign Grikkja og Bosníumanna í 1. umferð umspils um HM sæti verður á laugardaginn í Tuzli í Bosníu.
- Auglýsing -
