- Auglýsing -
- Aldís Ásta Heimisdóttir skoraði sjö mörk og átti þrjár stoðsendingar og Jóhanna Margrét Sigurðardóttir skoraði þrjú mörk og gaf eina stoðsendingu þegar lið þeirra Skara HF tapaði fyrir ríkjandi meisturum Sävehof, 37:27, í 22. og síðustu umferð sænsku úrvalsdeildarinnar í gærkvöld. Skara var aðeins með 10 leikmenn á skýrslu að þessu sinni.
- Skara hafnaði í 7. sæti deildarinnar með 22 stig í 22 leikjum. Framundan er úrslitakeppni átta efstu liðanna um meistaratitilinn. Sävehof vann deildarmeistaratitilinn með talsverðum yfirburðum. Liðið fékk 42 af 44 mögulegum.
- Í átta liða úrslitum mætir Skara HF liði H 65 Höör. Fyrsti leikurinn verður í Höör miðvikudaginn 29. mars og önnur viðureign í Skara sunnudaginn 2. apríl. Vinna þarf tvo leiki til þess að komast í undanúrslit.
- Sunna Guðrún Pétursdóttir varði átta skot, 28%, í sigurleik GC Amicitia Zürich á HSC Kreuzlingen, 26:21, á heimavelli í svissnesku A-deildinni í handknattleik í gærkvöld. Harpa Rut Jónsdóttir skoraði eitt mark fyrir Zürich-liðið sem er í 5. sæti af sex liðum í keppni efri hluta deildarinnar.
- Elín Jóna Þorsteinsdóttir varði fimm skot, 55,5%, á þeim skamma tíma sem hún stóð í marki Ringkøbing Håndbold í 11 marka tapi á heimavelli fyrir Ikast Håndbold, 32:21, í dönsku úrvalsdeildinni í gærkvöld þegar lokaumferðin fór fram. Ringkøbing Håndbold hafnaði í 10. sæti deildarinnar með 15 stig.
- Steinunn Hansdóttir var ekki í leikmannahópi Skanderborg Håndbold þegar liðið vann Aarhus United, 33:32, á heimavelli í lokaumferð í dönsku úrvalsdeildarinnar. Skanderborg Håndbold hafnaði í 12. sæti. Framundan er umspilskeppni fimm neðstu liðanna um að forðast fall úr deildinni.
- Auglýsing -
