- Auglýsing -
- Íslenski keppnishópurinn á heimsmeistaramótinu í handknattleik karla í Svíþjóð þarf ekki að hafa áhyggjur af covid á næstunni. Allir reyndust neikvæðir í gærkvöld við sýnatöku sem gerð var eftir að riðlakeppninni lauk. Næsta skimun verður eftir milliriðlakeppnina.
- Reynir Þór Stefánsson hefur skrifað undir samning við Fram til ársins 2026. Reynir Þór hefur vakið mikla athygli með Framliðinu í Olísdeildinni á leiktíðinni en hann hóf að minna á sig í leikjum liðsins á síðasta tímabili. Reynir Þór hefur leikið 14 leiki í vetur með Fram og skorað í þeim 46 mörk.
- Svíar hafa aldrei unnið stærri sigur á heimsmeistaramóti í handknattleik en í gær þegar þeir lögðu Úrúgvæmenn með 35 marka mun, 47:12, í lokaumferð C-riðils í Gautaborg. Fyrra met var 33 marka sigur á Áströlum, 49:16, á HM 2005 í Túnis. Úrúgvæmenn ráku lestina í C-riðlinum og taka sæti í keppninni um forsetabikarinn, sæti 25 til 32.
- Svartfellingar brutu blað í gærkvöld þegar þeir tryggðu sér í fyrsta sinn sæti í milliriðlakeppni heimsmeistaramóts karla í handknattleik. Þeir taka meira að segja tvö stig með sér inn í milliriðil eitt hvar þeir verða með Spánverjum, Frökkum, Slóvenum, Pólverjum og Írönum.
- Michael Damgaard hefur verið kallaður inn í leikmannahóp heimsmeistara Dana vegna meiðsla Rasmus Lauge. Óvíst er á þessu stigi hvort Lauge komi eitthvað við sögu á mótinu. Hann var ekki með í tveimur fyrstu leikjum Dana, var reyndar á skýrslu í fyrrakvöld í sigurleiknum á Barein.
- Auglýsing -
