- Auglýsing -
- Mattias Andersson hefur tekið fram markmannsgallann á nýjan leik tveimur árum eftir að hann lagði hann frá sér nýþveginn upp á hillu. Andersson verður varamarkvörður THW Kiel næstu vikurnar meðan Niklas Landin verður fjarverandi vegna aðgerðar á hné. Andersson, sem er 42 ára gamall, er markvarðaþjálfari Kiel. Dario Quenstedt er og verður aðalmarkvörður Kiel meðan Landin verður fjarri góðu gamni.
- Sören Haagen, hinn 46 ára gamli, markvörður og liðsfélagi Viktors Gísla Hallgrímssonar hjá dönsku bikarmeisturunum GOG segir það hafa verið einstakt að vinna danska bikarinn á síðasta sunnudag, aldarfjórðungi eftir að hann varð fyrst bikarmeistari með GOG. Haagen hefur víða komið við á löngum ferli. Auk GOG hefur hann leikið með Mors-Thy, Ribe-Esbjerg og KIF Kolding í heimalandinu og Flensburg í Þýskalandi.
- Hollenska landsliðskonan Delaila Amega leikur ekki með heimsmeisturum Hollands á Evrópumeistaramótinu í Danmörku. Hún sleit krossband í vinstra hné í leik Dortmund og Brest Bretagne í Meistaradeild Evrópu um síðustu helgi. Þetta er mikið áfall fyrir Amega, ekki síst í ljósi þess að hún sleit krossband í sama hné í ársbyrjun 2019. Ljóst er að hollenska landsliðið verður vængbrotið á EM en auk Amega verða Estavana Polman og Nyala Krullaars heldur ekki með vegna meiðsla. Polman sleit krossband í ágúst.
- Auglýsing -
