- Auglýsing -
- Andrea Jacobsen og samherjar hennar í sænska liðinu Kristianstad féllu úr leik í 16-liða úrslitum Evrópubikarkeppni kvenna í handknattleik í gær þegar þær töpuðu fyrir HC DAC Dunajská Streda, 33:21, í síðari viðureign liðanna í 16-liða úrslitum keppninnar. Kristianstad vann fyrri viðureignina sem einnig fór fram i í Slóvakíu, með tveggja marka mun. Andrea skoraði fjögur mörk í leiknum í gær.
- Alfreð Gíslason, landsliðsþjálfari Þýskalands, kallaði í gærmorgun Hendrik Wagner leikmann 2. deildarliðsins Ludwigshafen inn í þýska landsliðið sem tekur þátt í EM í handknattleik. Wagner kemur inn í liðið í stað Julius Kühn sem greindist með covid í fyrradag.
- Danski landsliðsmaðurinn Mathias Gidsel meiddist í leik Dana og Slóvena á EM í fyrradag. Gidsel sat yfir á æfingu landsliðsins í gær og taldar helmingslíkur á að hann verði með í dag gegn Norður Makedóníu.
- Þrír Króatar bættust í landsliðshópinn sem tekur þátt í EM. Talsvert hefur verið um smit innan króatíska liðsins og því gat Hrvoje Horvat þjálfari ekki komist hjá því að fá þrjá ferska leikmenn að heiman.
- Ungverski handknattleiksmaðurinn Matyas Györi greindist með covid19 í gær og verður ekki með í leiknum við Íslendinga á morgun.
- Max Darj leikur ekki með Svíum vegna covid og óvíst hvort hann taki eitthvað þátt í mótinu.
- Jure Dolenec lék ekki með Slóvenum gegn Dönum í fyrrakvöld vegna meiðsla. Fremur ósennilegt er að hann taki eitthvað þátt í mótinu, eftir því sem fregnir herma.
- Línumaðurinn frábæri, Stojanche Stoilov, hefur greinst öðru sinni með covid 19. Hann er talinn hafa leikið sinn síðasta leik á EM með landsliði Norður Makedóníu.
- Auglýsing -
