- Auglýsing -
- Sigurganga Andreu Jacobsen og félaga í EH Aalborg heldur áfram í næst efstu deild danska handknattleiksins. Í gær vann EH Aalborg liðsmenn HIK í heimsókn í Maglegårdshallen í Hellerup norður af Kaupmannahöfn, 21:17. Andrea skoraði þrjú mörk. EH Aalborg er efst í deildinni með 20 stig eftir 11 leiki, 10 sigrar í röð og eitt tap í fyrstu umferð. Bjerringbro er tveimur stigum á eftir. Holstebro, lið Bertu Rutar Harðardóttur er í þriðja sæti með 16 stig en á leik til góða á efstu liðin tvö.
- Sandra Erlingsdóttir skoraði tvö mörk og átti tvær stoðsendingar í þriggja marka sigri TuS Metzingen á HSG Bensheim/Auerbach, 34:31, á heimavelli í þýsku 1. deildinni í handknattleik í gær. TuS Metzingen færðist upp í áttunda sæti deildarinnar með þessu góða sigri. Liðið er með sex stig eftir sjö leiki.
- Bjarki Már Elísson fór á kostum og skoraði 10 mörk fyrir Veszprém í 14 marka sigri liðsins á CYEB Budakalász, 42:28, á heimavelli í ungversku 1. deildinni í handknattleik í gær. Yfirburðir Veszprém voru miklir í leiknum, t.d. var staðan að loknum fyrri hálfleik, 24:10. Veszprém er efst í deildinni með 24 stig eftir 12 leik. Ferencváros, sem Valur hefur mætt í tvígang á skömmum tíma í Evrópudeildinni, er komið upp í fjórða sæti með 15 stig eftir 12 leiki.
- Óðinn Þór Ríkharðsson skoraði sjö mörk, þar af eitt úr vítakasti, þegar Kadetten Schaffhausen tapaði á útivelli fyrir HC Kriens-Luzern, 31:28, í toppslag svissnesku A-deildarinnar í handknattleik karla í gærkvöld. Andy Schmid skoraði 10 mörk fyrir HC Kriens-Luzern í 19 skotum. Með sigrinum treysti HC Kriens-Luzern stöðu sína í efsta sæti deildarinnar. Kadetten Schaffhausen, sem á titil að verja undir stjórn Aðalsteins Eyjólfssonar, er í öðru sæti.
- Orri Freyr Þorkelsson skoraði eitt mark þegar Elverum vann Fjellhammer, 31:23, á útivelli í norsku úrvalsdeildinni í handknattleik. Elverum er í þriðja sæti norsku úrvalsdeildarinnar með 16 stig eftir 12 leiki, átta stigum á eftir Kolstad sem situr í efsta sæti.
- Auglýsing -
