- Auglýsing -
- Andrea Jacobsen og félagar í EH Aalborg unnu Bjerringbro á heimavelli, 27:25, í toppslag næst efstu deildar danska handknattleiksins í gær. Andrea skoraði fimm mörk og var næst markahæst. EH Aalborg er þar með efst í deildinni með 16 stig að loknum níu leikjum. Berta Rut Harðardóttir og samherjar í Holstebro eru í öðru sæti með 14 stig og eiga leik inni á EH Aalborg. Bjerringbro er í þriðja sæti með 14 stig eftir níu leiki. EH Aalborg hefur betur innbyrðis bæði gegn Holstebro og Bjerringbro.
- Viktor Gísli Hallgrímsson og samherjar í Nantes töpuðu öðru sinni í frönsku 1. deildinni í gærkvöld er þeir sóttu Toulouse heim, lokatölur 32:31. Toulouse hefur ekki tapað á heimavelli á leiktíðinni. Leikmenn Nantes fengu upplagt tækifæri til þess að jafna metin á síðustu sekúndum eftir að leikmenn Toulouse töpuðu boltanum. Markvörður Toulouse, Jef Lettens, sá til þess að svo varð ekki þegar hann varði skot eftir hraðaupphlaup rétt áður en leiktíminn var úti. Þrátt fyrir tapið er Nantes efst í deildinni með 18 stig eftir 11 leiki. PSG og Montepllier hafa einnig 18 stig en eiga leik inni á Nantes.
- Daníel Þór Ingason skoraði eitt mark þegar Balingen–Weilstetten hélt áfram sigurgöngu sinni í 2. deild þýska handknattleiksins í gærkvöld. Balingen lagði þá HSG Konstanz, 36:30, á heimavelli. Oddur Gretarsson lék ekki með Balingen að þessu sinni. Liðið er efst með 25 stig eftir 13 leiki. Eisenach er sex stigum á eftir í öðru sæti.
- Ólafur Andrés Guðmundsson var fjarri góðu gamni inni á leikvellinum þegar lið hans, GC Amicitia Zürich, vann meistara Kadetten Schaffhausen, 31:29, í Zürich í gær í svissnesku A-deildinni í handknattleik karla. Um var um að ræða annan leikinn í röð þar sem Ólafur er fjarverandi vegna lítilsháttar meiðsla. Hann var á varamannbekknum í hlutverki aðstoðarþjálfara.
- Þetta var þriðja tap meistara Kadetten í deildinni á leiktíðinni. Óðinn Þór Ríkharðsson skoraði sex mörk fyrir Kadetten, þar af skoraði hann fjögur mörk úr vítaköstum. Aðalsteinn Eyjólfsson þjálfari Kadetten gat ekki stýrt sínum mönnum í gær vegna veikinda. HC Kriens og Pfadi Winterthur sækja fast að liðinu. GC Amicitia Zürich situr sem fyrr í fjórða sæti.
- Bjarki Már Elísson skoraði fjögur mörk þegar Veszprém vann Csurgói KK, 44:28, á heimavell í ungversku 1. deildinni í handknattleik í gær. Veszprém er efst í deildinni með 20 stig að loknum 10 leikjum. Szeged er næst á eftir með 20 stig en hefur lokið 11 viðureignum. Fyrrgreint lið Csurgói KK er í fjórða sæti.
- Sigtryggur Daði Rúnarsson skoraði eitt mark þegar lið hans Alpla Hard vann Jags Vöslau, 36:32, á útivelli í austurrísku 1. deildinni í gær. Sigtryggur Daði leikur með Hard til ársloka sem lánsmaður frá ÍBV. Hard-liðið, sem Hannes Jón Jónsson þjálfar, er í öðru sæti deildarinnar með 19 stig eftir 11 leiki. Krems er á toppnum, er stigi fyrir ofan Hard.
- Aron Pálmarsson skoraði tvö mörk og átti tvær stoðsendingar þegar Aalborg Håndbold tapaði óvænt á heimavelli fyrir Skanderborg Aarhus, 31:24, í dönsku úrvalsdeildinni í gær. Þetta er stærsta tap Aalborg á heimavelli í dönsku úrvalsdeildinni í fimm ár og um leið þriðja tap liðsins í röð þegar horft er til allra móta. Slíkt hefur ekki átt sér stað síðan í febrúar 2018.
- Aalborg er núna í öðru sæti deildarinnar með 25 stig eftir 15 leiki og er tveimur stigum á eftir meisturum GOG og þremur stigum á undan Bjerringbro/Silkeborg.
- Haukur Þrastarson skoraði eitt mark fyrir pólska meistaraliðið Łomża Kielce þegar það vann enn einn sigurinn á heimavelli í pólsku 1. deildinni í gær, 40:25, á GA Unia Tarnów.
- Sænski miðjumaðurinn Jim Gottfridsson kemur væntanlega inn í lið Flensburg í dag þegar Stuttgart kemur í heimsókn í Flens-Arena í þýsku 1. deildina í handknattleik karla. Gottfridsson hefur verið frá í nærri hálfan annan mánuð vegna meiðsla.
- Auglýsing -
