- Auglýsing -
- Aðalsteinn Eyjólfsson og lærisveinar í Kadetten Schaffhausen töpuðu í fyrrakvöld fyrir HSC Suhr Aarau, 27:25, í sjöundu umferð svissnesku 1. deildarinnar í handknattleik en leikið var í Aarau. Þetta var annað tap Kadetten í deildinni það sem af er leiktíðar og situr liðið nú í 3. sæti með 10 stig, stigi á eftir Suhr Aarau og tveimur frá HC Kriens sem er í efsta sæti. Pfadi Winterhur er stigi á eftir Kadetten og á leik til góða. Næsti leikur Kadetten verður á heimavelli við Wacker Thun annað kvöld.
- Óskar Ólafsson og Viktor Petersen Norberg og samherjar þeirra í Drammen duttu ekki í lukkupottinn þegar dregið var til undanúrslita í norsku bikarkeppninni í gær. Drammen dróst á móti meisturum Elverum. Nærbø og ØIF Arendal eigast við í hinni viðureign undanúrslitanna sem fram fara 12. nóvember. Drammen fær þó heimaleik.
- Kent Ballegaard sem sagt var í gær upp störfum hjá danska handknattleiksliðinu Vendsyssel sagði í samtali við TV2 í Danmörku í gærkvöld það ekki vera rétt að ástæða uppsagnarinnar væri ekki að liðinu hafi gengið illa, eins og formaður félagsins sagði vera ástæðu uppsagnarinnar. Ballegard segir ástæðuna vera þá að foreldrar nokkurra leikmanna og leikmenn hafi krafist þess að honum væri sagt upp þar sem hann þykir harður í horn að taka. Christian Carlsen, formaður Vendsyssel, segir Ballegard vera gamansaman að halda því fram að leikmenn og foreldrar hafi farið fram á uppsögnina.
- Elín Jóna Þorsteinsdóttir, landsliðsmarkvörður, og Steinunn Hansdóttir leika með Vendsyssel sem rekur lestina í dönsku úrvalsdeildinni með eitt stig að loknum sex leikjum. Fjallað var um uppsögn Ballegaard í frétt á handbolti.is í gær.
- Auglýsing -
