- Auglýsing -
- Anton Gylfi Pálsson og Jónas Elíasson dæma viðureign PPD Zagreb og Dinamo Bucuresti í A-riðli Meistaradeildar Evrópu í handknattleik karla í kvöld. Leikurinn fer fram í Zagreb.
- Bjarni Ófeigur Valdimarsson skorað þrjú mörk og gaf fimm stoðsendingar í naumu tapi IFK Skövde í heimsókn Guif í Eskilstuna í gær, 33:32. Skövde heldur enn öðru sæti deildarinnar með 11 stig eftir átta leiki og er fimm stigum á eftir Kristianstad sem trónir á toppnum.
- Tryggvi Þórisson og félagar í Sävehof eru í þriðja sæti með 10 stig eftir sjö leiki. Sävehof vann Malmö í fyrrakvöld, 26:25. Tryggvi skoraði ekki í leiknum.
- Selma Þóra Jóhannsdóttir, markvörður, hefur fengið félagaskipti úr HK yfir til FH. Selma Þóra lék um árabil með Gróttu áður en hún færði sig yfir í Kópavoginn. Hún var í fæðingarorlofi á síðasta keppnistímabili.
- Annar markvörður, Sif Hallgrímsdóttir, hefur gengið til liðs við KA/Þór frá Haukum. Sif hefur verið í æfingahópum yngri landsliða kvenna.
- HK-ingurinn Bjarki Finnbogason hefur einnig ákveðið að söðla um og fara til Svíþjóðar. Ekki er getið um það á vef HSÍ til hvaða félags í sænska konungsríkinu Bjarki gengur til liðs við.
- André Haber sem þjálfað hefur þýska 1. deildarliðið Leipzig sem Viggó Kristjánsson leikur með hefur verið látinn taka pokann sinn. Leipzigliðið hefur alls ekki sýnt sínar réttu hliðar fram til þessa og hefur m.a. fengið fjögur stig í níu leikjum. Leipzig hefur aðeins unnið einn leik.
- Auglýsing -
