- Auglýsing -
- Aron Pálmarsson skoraði fjögur mörk og gaf fjórar stoðsendingar þegar lið hans Aalborg tapaði fyrir THW Kiel, 30:26, í 10. umferð B-riðils Meistaradeildar Evrópu í gærkvöld. Leikið var í Álaborg. Kristian Bjørnsen var markahæstur hjá Aalborg með átta mörk. Sander Sagosen skoraði sex sinnum fyrir Kiel sem er í fjórða sæti riðilsins. Aalborg er í sjötta sæti. Barcelona er í efsta sæti með 19 stig eftir 10 leiki en liðið lagði Nantes, 37:33, í Frakklandi í gær. Viktor Gísli Hallgrímsson var ekki með Nantes vegna meiðsla.
- Sigvaldi Björn Guðjónsson skoraði sex mörk og átti tvær stoðsendingar og Janus Daði Smárason skoraði fjórum sinnum og gaf átta stoðsendingar þegar lið þeirra Kolstad vann Nærbø, 30:24, á útivelli í 13. umferð norsku úrvalsdeildarinnar í handknattleik í gærkvöld. Kolstad hefur unnið alla leiki sína til þessa og er með yfirburða forystu í deildinni. Drammen er í öðru sæti, sjö stigum á eftir Kolstad.
- Grétar Ari Guðjónsson og félagar í Sélestat unnu í gærkvöld sinn fyrsta leik í frönsku 1. deildinni í handknattleik. Sélestat, sem er nýliði í deildinni og komst fremur óvænt upp úr 2. deild í vor, lagði Limoges, 31:29, á heimavelli Limoges. Grétar Ari sat á bekknum allan leikinn meðan Romain Mathias félagi hans í markinu fór á kostum og var með 39% markvörslu.
- Elín Jóna Þorsteinsdóttir landsliðsmarkvörður varði 11 skot, 29%, þegar lið hennar Ringkøbing Håndbold gerði jafntefli á heimavelli við Silkeborg-Voel KFUM, 28:28, í dönsku úrvalsdeildinni í handknattleik í gærkvöld. Ringkøbing er í 9. sæti deildarinnar með sjö stig eftir 11 leiki en 14 lið eru í deildinni.
- Asíukeppni karla í handknattleik á næsta ári fer fram í Doha í Katar frá 18. til 28. okótóber. Sigurliðið tryggir sér farseðil á Ólympíuleikana sem fram fara í París sumarið 2024
- Franska stórskyttan Noah Virgil Angelo Bardou sem kom til Harðar fyrir tímabilið fékk á dögunum félagaskipti heim til Frakklands. Bardou náði sér ekki á strik með Herði.
- Auglýsing -
