- Auglýsing -
- Rúnar Sigtryggsson og lærisveinar hans í EHV Aue töpuðu í gærkvöld fyrir efsta liði þýsku 2. deildarinnar, HSV Hamburg, 28:24. Leikið var í Hamborg. Staðan var jöfn í hálfleik, 13:13. Arnar Birkir Hálfdánsson skoraði tvö af mörkum Aue. Sveinbjörn Pétursson stóð í marki liðsins í um 40 mínútur og varði 10 skot, þar af eitt vítakasti. Þetta gerði liðlega 37% hlutfallsmarkvörslu.
- Þrír leikmenn sænska kvennalandsliðsins urðu að draga sig út úr hópnum við komuna heim frá Úkraínu í fyrradag eftir að í ljós kom að Johanna Westbergs var smituð af kórónuveirunni. Hún hafði deilt herbergi með Jamina Roberts og Johanna Bundsen. Þar sem þær voru þar af leiðandi útsettar fyrir smiti urðu þær einnig að kveðja hópinn við komuna til Lundar.
- Þar með er ekki öll sagan sögð því þegar kom fram á miðjan dag í gær tilkynnti Tomas Axnér, landsliðsþjálfari, að ákvörðun hefði verið tekin að gefa öllum leikmönnum sem tóku þátt í leiknum í Úkraínu frí auk starfsmanna að honum undanskildum vegna ótta um smit. Þess í stað valdi Axnér nýjan landsliðshóp með 14 leikmönnum sem hann teflir fram i kvöld. Af þeim eru sjö nýliðar.
- Sænska landsliðið vann fyrri leikinn í Úkraínu með 14 marka mun, 28:14. Þar af leiðandi eru Svíar nokkuð vissir um að hafa tryggt sér farseðilinn á HM á Spáni og hafa því litlar áhyggjur af síðari leiknum sem fram fer í Lundi í kvöld.
- Leikmenn toppliðs þýsku 1. deildar kvenna í Þýskalandi, Borussia Dortmund, voru vart komnir úr 10 daga sóttkví eftir að smit greindist innan hópsins en að þeir eru á ný komnir í sóttkví eftir að fleiri smit greindust meðal leikmanna sem höfðu sloppið í fyrra skiptið. Ljóst er að Dortmund mun ekki leika á ný fyrr en nokkuð verður komið fram í maí eftir að hafa verið meira og minna allan apríl í sóttkví.
- Enn koma upp úr dúrnum smit hjá botnliði 1. deildar karla í Þýskalandi, Coburg. Forráðamenn félagsins eru sennilega fegnir að framundan er hlé frá keppni í deildinni vegna landsleikja en liðið hefur ekki leikið í meira en viku. Óljóst er hvenær leikmenn verða klárir í slaginn á ný.
- Auglýsing -
