- Auglýsing -
- Axel Stefánsson er annar þjálfari Storhamar í Noregi sem komst í gærkvöld í úrslit í úrslitakeppni norsku úrvalsdeildarinnar í handknattleik kvenna. Storhamar vann Sola með eins marks mun á heimavelli, 25:24. Storhamar vann tvær viðureignir en tapað einni, þeirri fyrstu á heimavelli. Storhamar var fimm mörk yfir í hálfleik í gær. Leikmenn Sola bitu í skjaldarrendur í síðari hálfleik og höfðu nærri því kreist út framlengingu.
- Storhamar mætir meisturum síðustu ára, Vipers Kristiansand, í úrslitum. Fyrsta viðureign liðanna verður í Kristjánssandi á þriðjudaginn.
- Sænski leikstjórnandinn Jim Gottfridsson leikur ekki meira með Flensburg á keppnistímabilinu. Hann meiddist á hægra hné á æfingu á dögunum. Þetta er þriðju erfiðu meiðslin sem henda Gottfridsson á tímabilinu.
- Daninn Martin Albertsen er hættur þjálfun kvennalandsliðs Sviss. Hann tekur við þjálfun ungverska kvennaliðsins FTC, Ferencváros, í sumar. Albertsen hefur verið þjálfari kvennalandsliðs Sviss í fimm ár. Undir hans stjórn tók landsliðið í fyrsta sinn þátt í lokakeppni EM í nóvember á síðasta ári. Albertsen var með samning við svissneska handknattleikssambandið fram á næsta ár.
- Víðar en á Íslandi er mikill áhugi fyrir leikjum í úrslitakeppni í handknattleik. Í gær hófst sala hjá norska liðinu Elverum á miðum á aðra viðureign liðsins við Kolstad sem fram fer sunnudaginn 28. maí. Ríflega 1.000 miðar seldust upp á stundarfjórðungi. Fyrsta viðureign liðanna úrslitum fer fram í Kolstad Arena í Þrándheimi á miðvikudaginn.
- Auglýsing -
