- Auglýsing -

Molakaffi: Bjarki Már, Elísa Donni, Odense, Neagu, Gros, Györ

Bjarki Már Elísson, Lemgo. Mynd/GWD Minden
  • Bjarki Már Elísson, landsliðsmaður í handknattleik og leikmaður Lemgo, var valinn í úrvalslið 30. umferðar í þýsku 1. deildinni í handknattleik á dögunum.  Bjarki Már skoraði átta mörk, þar af eitt úr vítakasti, þegar Lemgo vann Stuttgart á heimavelli í umferðinni, 35:29.
  • Elísa Elíasdóttir hefur nú undirritað nýjan þriggja ára samningi við Handknattleiksdeild ÍBV. Elísa er ungur og bráðefnilegur línumaður sem hefur á yfirstandandi tímabili leikið stórt hlutverk í meistaraflokksliði ÍBV auk þess sem hún á að baki leiki með yngri landsliðunum. 
  • Kristján Örn Kristjánsson, Donni, skoraði eitt mark þegar PAUC tapaði naumlega fyrir PSG, 29:28, á heimavelli í gær í frönsku 1.deildinni í handknattleik. PSG er sem fyrr efst í deildinni en PAUC er í fjórða sæti. 
  • Odense Håndbold vann Viborg í fyrsta úrslitaleik liðanna um danska meistaratitilinn í handknattleik kvenna á laugardaginn, 29:20. Næsti leikur liðanna verður í Viborg á laugardaginn.  Esbjerg og Herning-Ikast gerðu jafntefli, 29:29, í fyrstu viðureign um bronsverðlaunin á heimavelli Esbjerg. 
  • Rúmenska handknattleikskonan Cristina Neagu tekur ekki þátt í fleiri handboltaleikjum á næstunni. Hún gekkst undir aðgerð á hné fyrir helgina. Neagu varð rúmenskur meistari á dögunum með CSM Búkarest. Rúmenska landsliðið öðlaðist ekki keppnisrétt á Ólympíuleikunum í sumar. Þar af leiðandi ætti Neagu, sem er 32 ára gömul, að fá góðan tíma til að jafna sig og mæta í góðu formi til leiks á næsta keppnistímabili.
  • Slóvenska handknattleikskonan Ana Gros var kjörin besti leikmaður frönsku 1. deildarinnar í handknattleik á keppnistímabilinu. Gros hefur leikið afar vel með Brest Bretagne á leiktíðinni og er m.a. bæði markahæst í frönsku deildinni og í Meistaradeild Evrópu. 
  • Ungverska stórliðið Györ varð á laugardaginn ungverskur bikarmeistari í handknattleik kvenna. Györ vann MTK Budapest í úrslitaleik, 33:21.
- Auglýsing -
- Auglýsing -

Nýjustu fréttir

- Auglýsing -