- Auglýsing -
- Bjarki Már Elísson var markahæstur hjá Veszprém með sex mörk þegar liðið vann Gyöngyös á heimavelli, 43:30, í ungversku bikarkeppninni í handknattleik, 8-liða úrslitum, í gærkvöld. Pick Szeged komst einnig áfram í undanúrslit í gær með öruggum sigri á Veszprémi KKFT, 41:28. Debas og Tatabánya voru áður búin að vinna sér sæti í undanúrslitum bikarkeppninnar.
- Orri Freyr Þorkelsson og félagar hans í Elverum unnu Drammen í hörkuleik á útivelli í norsku úrvalsdeildinni í gær, 26:23. Orri Freyr skoraði eitt mark. Viktor Petersen Norberg og Óskar Ólafsson skoruðu tvö mörk hvor fyrir Drammen sem situr í fjórða sæti deildarinnar. Elverum er í öðru sæti og mun enda þar hvernig sem tveir síðustu leikir liðsins í deildinni enda.
- Ágúst Elí Björgvinsson varði 13 skot, þar af eitt vítkast, 32%, þegar Ribe-Esbjerg tapaði á heimavelli fyrir SøndersjyskE, 20:28, í dönsku úrvalsdeildinni í handknattleik í gærkvöld. Elvar Ásgeirsson skoraði tvö mörk fyrri Ribe-Esbjerg og átti tvær stoðsendingar. Arnar Birkir Hálfdánsson skoraði ekki mark að þessu sinni. Ribe-Esbjerg er í 9. sæti deildarinnar þegar þrjár umferðir eru eftir.
- Halldór Jóhann Sigfússon fagnaði mikilvægum sigri í stóli þjálfara TTH Holstebro í gærkvöld þegar liðið lagði Fredericia Håndboldklub, 28:27, í dönsku úrvalsdeildinni í gærkvöld. Leikið var í Holstebro. Einar Þorsteinn Ólafsson skoraði eitt mark og var einu sinni vísað af leikvelli í liði Fredericia Håndboldklub sem Guðmundur Þórður Guðmundsson þjálfar. Engu sögum fer af því hvort Einar Þorsteinn hafi farið á kostum í leiknum.
- Fredericia Håndboldklub er í sjöunda sæti dönsku úrvalsdeildarinnar með 24 stig. Holstebro er í áttunda sæti með 20 stig eins og Ribe-Esbjerg.
- Bjarni Ófeigur Valdimarsson skoraði sex mörk fyrir IFK Skövde þegar liðið náði jafntefli við Malmö á útivelli í sænsku úrvalsdeildinni í handknattleik karla, 29:29. Skövde situr í sjötta sæti deildarinnar þegar tvær umferðir eru eftir.
- Tryggvi Þórisson skoraði ekki fyrir Sävehof í sigurleik á Alingsås, 30:23, í sænsku úrvalsdeildinni á heimavelli. Sävehof er í öðru sæti deildarinnar með 39 stig eftir 24 leiki, stigi á eftir Kristianstad sem á leik til góða.
- Auglýsing -
