- Auglýsing -
- Bjarni Ófeigur Valdimarsson skoraði tvö mörk í gærkvöld fyrir IFK Skövde er liðið tapaði fyrir Ystads IF, 28:24, í viðureign liðanna í sænsku úrvalsdeildinni í handknattleik. Leikið var í Ystad. Liðin höfðu þar með sætaskipti í deildinni. Ystad fluttist upp í þriðja sæti en Skövde fór niður í fjórða sæti stigi á eftir. Bjarni og félagar eiga leik til góða á Ystad.
- Viðureign HC Kriens og Kadetten Schaffhausen í svissnesku A-deildinni í handknattleik sem fram átti að fara í gærkvöld var frestað vegna kórónuveirunnar sem hefur stungið sér niður á meðal liðanna. Aðalsteinn Eyjólfsson er þjálfari Kadetten sem er langefst og ósigrað í deildinni.
- Sænska handknattleikskonan Nathalie Hagman er lang markahæst á HM kvenna og nær engar líkur á að komið verði í veg fyrir að hún verði markadrottning mótsins þótt hún taki ekki þátt í fleiri leikjum. Hagman skoraði 71 mark. Irina Alexandrova frá Kasakstan er næst á eftir með 43 mörk og einnig Elke Josselinne Karsten, Argentínu, og Patricia Kovacs frá Austurríki.
- Úrslitaleikjum norsku bikarkeppninnar í handknattleik karla og kvenna sem til stóð að færu fram 29. desember hefur verið slegið á frest vegna hraðrar útbreiðslu kórónuveirunnar í Noregi. Óvíst er hvenær reynt verður að koma leikjunum á dagskrá.
- Auglýsing -
