- Auglýsing -
- Bjarni Ófeigur Valdimarsson og samherjar hans í IFK Skövde féllu í gær úr leik í átta liða úrslitum sænsku úrvalsdeildarinnar í handknattleik þegar þeir töpuðu í þriðja sinn fyrir Ystads IF, 37:36, eftir framlengingu í Ystad. Bjarni Ófeigur átti stórleik fyrir IFK Skövde. Hann skoraði 10 mörk í 13 skotum og átti þrjár stoðsendingar. Einnig var Bjarna einu sinni vikið af leikvelli. Að öllum líkindum var þetta síðasta keppnisleikur Bjarna Ófeigs fyrir Skövde. Frá og með næsta keppnistímabili leikur hann með GWD Minden í Þýskalandi.
- Hilmar Bjarki Gíslason skrifaði á dögunum undir nýjan tveggja ára samning við handknattleiksdeild KA og er nú samningsbundinn félaginu út tímabilið 2025. Hilmar sem verður tvítugur í sumar hefur unnið sig jafnt og þétt í stærra hlutverk hjá KA á undanförnum mánuðum.
- Nicolej Krickau þjálfari Danmerkurmeistarar GOG í handknattleik karla hefur framlengt samning sinn við félagið til ársins 2025. GOG hefur gert það afar gott undir stjórn Krickau og er m.a. komið í átta liða úrslit Meistaradeildar Evrópu.
- Ríflega átta þúsund áhorfendur voru á vináttulandsleik Dana og Svía í handknattleik kvenna í Royal Arena í Kaupmannahöfn í gærkvöld. Reikna má með að flestir þeirra hafi farið glaðir heim eftir tveggja marka sigur danska landsliðsins, 27:25. Danir svöruðu þar með fyrir tap í fyrri vináttuleik þjóðanna á miðvikudagskvöld, 34:30, í Helsingborg. Sænska landsliðskonan Nathalie Hagman lék sinn 200. landsleik í gær.
- Franska kvennalandsliðið vann það brasilíska í vináttuleik í gærkvöld, 23:18. Leikurinn fór fram í Frakklandi.
- Auglýsing -
