- Auglýsing -
- Bjarni Ófeigur Valdimarsson var besti leikmaður IFK Skövde í gærkvöld þegar liðið gerði jafntefli við Önnereds á heimavelli, 28:28, í sænsku úrvalsdeildinni í handknattleik. Bjarni Ófeigur skoraði sjö mörk og átti eina stoðsendingu auk þess að láta til sín taka í vörninni. IFK Skövde er í fimmta sæti.
- Tryggvi Þórsson skoraði eitt mark í tveggja marka sigri Sävehof á Redbergslid, 29:27, á útivelli í sænsku úrvalsdeildinni í gærkvöld. Sävehof er í öðru sæti deildarinnar með 19 stig eftir 12 leiki. Kristianstad er efst með 23 stig.
- Ásgeir Snær Vignisson náði ekki að skora fyrir Helsingborg þegar liðið tapað á útivelli, 28:24, fyrir Hallby HK í sænsku úrvalsdeildinni í gærkvöld. Nýliðar Helsingborg eru í 12. sæti af 14 liðum deildarinnar með sjö stig.
- Roland Eradze og félagar í HC Motor töpuðu fyrir Lubbecke, 30:26, í þýsku 2. deildinni í gærkvöld en leikið var í Düsseldorf. HC Motor er á meðal neðstu liða deildarinnar með fjögur stig.
- Halldór Jóhann Sigfússon og liðsmenn TTH Holstebro unnu Nordsjælland Håndbold, 36:30, á heimavelli í dönsku úrvalsdeildinni í gærkvöld. TTH Holstebro er i sjötta sæti deildarinnar með 17 stig eftir 15 leiki.
- Fredericia Håndboldklub er í sjöunda sæti deildarinnar með 16 stig eftir fjögurra marka sigur á Lemvig á heimavelli í gærkvöld, 25:21. Einar Þorsteinn Ólafsson skoraði ekki mark fyrir Fredericia Håndboldklub sem Guðmundur Þórður Guðmundsson þjálfar. Daníel Freyr Andrésson stóð skamman tíma í marki Lemvig og varði 3 skot, 37,5%.
- Grétar Ari Guðjónsson, markvörður, og samherjar hans í Sélestat töpuðu á heimavelli fyrir Istres í slag neðstu liðanna tveggja í frönsku 1. deildinni í handknattleik í gærkvöld, 39:32. Grétar Ari varði 6 skot í markinu, 19%. Sélestat er án stiga í neðsta sæti eftir 11 umferðir.
- Kristján Örn Kristjánsson, Donni, var fjarverandi vegna meiðsla þegar lið hans PAUC vann Nimes á útivelli, 33:31. PAUC situr í sjöunda sæti með 12 stig eftir 11 leiki og getur nú farið að búa sig af krafti undir viðureign við Val í Evrópudeildinni á heimavelli á þriðjudagskvöld.
- Auglýsing -
