- Auglýsing -
- Bjarni Ófeigur Valdimarsson lék með IFK Skövde á æfingamóti þriggja liða, Grimsrud Cup, í Halden í Noregi um nýliðna helgi. Hann skoraði sjö mörk og var markahæstur þegar Skövde vann Drammen, 33:25, eftir að hafa verið tveimur mörkum yfir í hálfleik, 15:13. Viktor Petersen Norberg skoraði sex mörk fyrir Drammen og Óskar Ólafsson fjögur þrátt fyrir að flensa og slappleiki væri að hrjá hann.
- Bjarni Ófeigur skoraði fimm mörk daginn eftir þegar Skövde vann Elverum, 26:25. Ekki kemur fram á heimasíðu Skövde hvort Orri Freyr Þorkelsson skoraði mark fyrir Elverum í leiknum.
- Berta Rut Harðardóttir, fyrrverandi leikmaður Hauka, skoraði tvö mörk fyrir Holstebro þegar liðið vann DHG Odense, 33:23, í næst efstu deild danska handknattleiksins á sunnudaginn. Holstebro er í öðru sæti deildarinnar með 24 stig, er tveimur stigum á eftir EH Aalborg sem Andrea Jacobsen leikur með.
- Rasmus Lauge lék sinn fyrsta leik fyrir danska landsliðið í gærkvöld þegar Danir lögðu Egypta örugglega, 30:25, í síðasta leik 4. riðils milliriðlakeppninnar. Lauge, sem hefur glímt við meiðsli, sagði við TV2 eftir leikinn að hann væri afar ánægður með að taka þátt um leið og hann vonast til að verða með í næstu leikjum. Koma Lauge í danska liðið styrkir það til muna og var það öflugt fyrir.
- Norski landsliðsmaðurinn Alexander Blonz er sagður vera á leiðinni til Danmerkurmeistara GOG í sumar. Blonz er liðsmaður Pick Szeged en hefur mátt standa í skugganum af Austurríkismanninum Sebastian Frimmel. Blonz er sagður eiga að fylla skarð Svíans Jerry Tollbring hjá GOG. Tollbring gengur til liðs við Füchse Berlin í sumar.
- Auglýsing -
