- Auglýsing -
- Björn Ingi Jónsson hefur verið ráðinn aðstoðarþjálfari meistaraflokks kvenna hjá FH og aðalþjálfari 4. flokks kvenna hjá félaginu. Hann kemur til starfa í ágúst. Björn Ingi hefur þjálfað hjá Val í sex ár og var þar áður hjá KR í fjögur ár. Auk þess hefur Björn Ingi verið í kringum u-landslið karla og kvenna undanfarin misseri, segir í tilkynningu handknattleiksdeildar FH í gær.
- Elliði Snær Viðarsson hafnaði í öðru sæti í kjöri á leikmanni maímánaðar í þýsku 1. deildinni í handknattleik. Handbolti.is sagði frá því í síðustu viku að Eyjamaðurinn væri einn sjö leikmanna deildarinnar sem valið stæði á milli. Leif Tissier leikmaður HSV Hamburg var hlutskarpastur. Hann fékk um 45% atkvæða. Elliði Snær hlaut liðlega fjórðung greiddra atkvæða.
- Elliði Snær á eitt af sex glæsilegustu mörkum mánaðarins. Er hægt að kjósa á milli markanna til 12. júní á þessum hlekk.
- Emelía Ósk Aðalsteinsdóttir hefur skrifað undir samning við Fjölni. Hún leikur á línunni og hefur átt sæti í yngri landsliðunum.
- Logi Gautason skrifaði á dögunum undir nýjan tveggja ára samning við handknattleiksdeild KA og er nú samningsbundinn félaginu út tímabilið 2024-2025. Logi, sem spilar í vinstra horni, er á átjánda ári. Hann var í burðarhlutverki í ungmennaliði KA sem endaði í 5. sæti Grill 66-deildarinnar en hann gerði alls 44 mörk í 12 leikjum, segir m.a. í tilkynningu handknattleiksdeildar KA.
- Auglýsing -
