- Auglýsing -
- Eyjamaðurinn Breki Óðinsson hefur skrifað undir nýjan samning við Íslandsmeistara ÍBV. Breki er vinstri hornamaður og var meira og minna með ÍBV-liðinu á síðustu leiktíð.
- Arnór Atlason er tekinn formlega til starfa hjá danska úrvalsdeildarliðinu Team Tvis Holstebro sem aðalþjálfari liðsins. Þetta er í fyrsta sinn sem Arnór er aðalþjálfari félagsliðs. Fimm nýir leikmenn komu til Holstebro í sumar.
- Eftir nokkur mögur ár er Arnóri ætlað að leiða uppbyggingu liðs félagsins á næstu árum. Team Tvis Holstebro komst næst því að vinna danska meistaratitilinn 2016 þegar liðið hafnaði í öðru sæti. Vorið 2022 var Team Tvis Holstebro nærri fallið úr úrvalsdeildinni en slapp eftir sigur í umspilsleikjum við lið úr næst efstu deild.
- Arnór Snær Óskarsson sem gekk til liðs við Rhein-Neckar Löwen í sumar frá Val er kominn á fulla ferð við æfingar og keppni. Um síðustu helgi lék RNLöwen æfingaleik gegn smáliði og vann með miklum yfirburðum. Á komandi dögum stendur fyrir dyrum hjá liðinu þátttaka í æfingamóti.
- Arnór Snær lék í treyju með númerið 6 á bakinu hjá Val. Það númer var upptekið hjá RNLöwen. Þessi í stað valdi Arnór Snær númerið 11 sem var laust. Ólafur Stefánsson lék í treyju með númerið 11 á bakinu hjá félaginu á sínum tíma og eins og hann gerði reyndar nær allan ferilinn. Arnór Snær fetar þar með í fótspor Ólafs að þessu leyti til.
- 17 ára landsliðið í handknattleik, sem hóf keppni á Ólympíuhátíð Evrópuæskunnar í Maribor í Slóveníu í gær með því að leggja norska landsliðið, 34:32, mætir þýska landsliðinu í kvöld. Flautað verður til leiks klukkan 18.30. Þjóðverjar töpuðu fyrir Slóveníu í fyrstu umferð mótsins í gær, 30:28. Íslensku piltarnir mæta Slóvenum á morgun, miðvikudag.
- Í hinum riðli keppninnar í karlaflokki vann Ungverjaland lið Svartfjallalands, 39:28, og Króatía lagði Portúgal, 33:28.
- Auglýsing -
