- Auglýsing -
- Daníel Þór Ingason og Oddur Gretarsson skoruðu fimm mörk hvor þegar lið þeirra Balingen-Weilstetten vann N-Lübbeck naumlega á heimavelli, 28:27, í 2. deild þýska handknattleiksins í gær. Liðin eru í tveimur efstu sætum deildarinnar.
- Örn Vésteinsson Östenberg kom lítið við sögu hjá N-Lübbeck sem er í öðru sæti með 44 stig eftir 13 leik. Balingen er efst, sjö stigum á undan. Eisenach og Dessauer eru með 43 og 42 stig í þriðja og fjórða sæti og eiga leik inni.
- Tumi Steinn Rúnarsson skoraði þrjú mörk fyrir HSC Coburg í níu marka sigri á Empor Rostock í þýsku 2. deildinni í gær en leikurinn fór fram í Rostock. Sveinn Andri Sveinsson lék ekki með Empor í leiknum fremur en í síðustu leikjum. Hann mun vera kominn heim til Íslands fótbrotinn eftir því sem næst verður komist en m.a. sást til Sveins Andra á oddaleik ÍR og Gróttu í umspili Olísdeildar kvenna í Skógarseli í gær.
- Coburg er komið upp í 10. sæti deildarinnar með 29 stig í 31 leik. Rostock er sem fyrr í næst neðsta sæti og virðist fátt geta komið fyrir fall í 3. deild nema að algjör umskipti eigi sér stað á leik liðsins í síðustu umferðunum.
- Arnór Þór Gunnarsson og samherjar í Bergischer fengu skell í heimsókn sinni til Lemgo í þýsku 1. deildinni í handknattleik í gær, 38:28. Arnór Þór skoraði fjögur mörk, ekkert þeirra úr vítaköstum. Bergischer HC er í miðri deildinni, í níunda sæti af 18 liðum, með 26 stig þegar liðið á sjö leiki eftir óleikna.
- Fredericia Håndboldklub, liðið sem Guðmundur Þórður Guðmundsson þjálfar í dönsku úrvalsdeildinni í handknattleik karla er á talsverðri siglingu um þessar mundir í úrslitakeppninni um danska meistaratitilinn. Fredericia Håndboldklub vann í gær Skanderborg Håndbold, 26:23, í Fredericia.
- Fredericia Håndboldklub er komið í annað sæti annars riðils átta liða úrslitanna með 4 stig eftir þrjá leiki. Keppnin er hálfnuð. Ef fram heldur sem horfir á Fredericia Håndboldklub möguleika á sæti í undanúrslitum. Einar Þorsteinn Ólafsson átti eina stoðsendingu í leiknum í gær og var fastur fyrir í vörninni, að vanda.
- Auglýsing -
