- Auglýsing -
- Daníel Þór Ingason skoraði fjögur mörk og Oddur Gretarsson tvö þegar Balingen-Weilstetten gerði jafntefli í heimsókn til Bieteigheim í þýsku 2. deildinni í handknattleik í gærkvöld, 24:24. Balingen er áfram með örugga forystu í efsta sæti deildarinnar með 29 stig eftir 16 leiki, 13 sigurleikir og þrjú jafntefli.
- Tumi Steinn Rúnarsson og samherjar í Coburg unnu góðan sigur á heimavell, 27:21, á Wölfe Würzburg í þýsku 2. deildinni. Tumi Steinn skoraði þrjú mörk. Coburg er komið upp í áttunda sæti með 17 stig eftir 16 leiki.
- Íslendingatríóið hjá Skara HF vann annan leik sinn í röð í sænsku úrvalsdeildinni í handknattleik kvenna í gærkvöld þegar liðið lagði Lugi í hörkuleik á heimavelli, 23:22. Aldís Ásta Heimisdóttir skoraði eitt mark en þær Ásdís Guðmundsdóttir og Jóhanna Margrét Sigurðardóttir skoruðu ekki mark að þessu sinni. Ásdísi var einu sinni vísað af leikvelli og Jóhanna Margrét átti eina stoðsendingu. Skaraliðið er komið upp í sjöunda sæti með átta stig eftir níu leiki.
- Ólafur Andrés Guðmundsson skoraði tvö mörk og var einu sinni vísað af leikvelli í tvær mínútur þegar lið hans GC Amicitia Zürich tapaði á heimavelli í gærkvöld fyrir HSC Suhr Aarau, 30:26, í svissnesku A-deildinni í handknattleik karla. GC Amicitia Zürich situr í fimmta sæti deildarinnar af 10 liðum. HSC Suhr Aarau lagði grunn að sigrinum í fyrri hálfleik en að honum loknum var liðið með sex marka forskot, 18:12.
- Tryggvi Þórisson kom lítið við sögu þegar lið hans IK Sävehof gerði jafntefli við botnlið Redbergslids, 33:33, á heimavelli í sænsku úrvalsdeildinni í handknattleik í gær. IK Sävehof er í öðru sæti deildarinnar með 24 stig eftir 15 umferðir, er fjórum stigum á eftir IFK Kristianstad sem er efst.
- Ásgeir Snær Vignisson skoraði heldur ekki mark fyrir Helsingborg þegar liðið tapaði á heimavelli fyrir IF Hallby HK 26:23, á heimavelli, einnig í sænsku úrvalsdeildinni. Helsingborg er í níunda sæti.
- Axel Stefánsson, annar þjálfara norska úrvalsdeildarliðsins Storhamar, fagnaði sigri með liðinu í gærkvöld í heimsókn til Tertnes í Bergen, 27:22. Lovísa Thompson er ekki orðin gjaldgeng með Tertnes. Tertnes rekur lestina í deildinni með fjögur stig eftir níu leiki. Storhamar er í þriðja sæti með 11 stig en á leik inni á Molde sem er í öðru sæti með 12 stig. Vipers er eins og venjulega efst og taplaust.
- Steinunn Hansdóttir skoraði eitt mark fyrir Skanderborg í gærkvöld þegar liðið steinlá á heimavelli fyrir Ikast, 35:24, í dönsku úrvalsdeildinni í handknattleik. Skanderborg er næst neðst í deildinni með þrjú stig eftir 11 leiki. Aðeins Randers er neðar en félagið varð gjaldþrota í upphafi vetrar og allir leikir liðsins strikaðir út.
- Auglýsing -
