- Auglýsing -
- Spánverjanum David Davis var í gærmorgun gert að axla sín skinn og yfirgefa þjálfarastólinn hjá ungverska stórliðinu Veszprém eftir þriggja ára veru. Að mati stjórnenda liðsins hefur árangur liðsins ekki verið viðundandi á keppnistímabilnu. Það tapaði báðum úslitaleikjunum um ungverska meistaratitilinn fyrir Pick Szeged auk þess sem það varð að játa sig sigrað í átta liða úrslitum Meistaradeildarinnar.
- Forráðamenn rússneska liðsins Rostov-Don hafa náð samkomulagi við þjálfarann Per Johansson að framlengja samning sinn til eins árs. Þrátt fyrir vonbrigði yfir að falla úr keppni í átta liða úrslitum Meistaradeildar ríkir ánægja með störf Johansson hjá Rostov-Don en hann var ráðinn til liðsins fyrir ári þegar Ambros Martín hætti.
- Grænt ljós hefur verið gefið á að takmarkaður fjöldi áhorfenda megi vera á leikjum úrslitahelgi Meistaradeildar karla í Lanxess-Arena í Köln um næstu helgi. Eins og staðan er núna mega 500 áhorfenda mæta en haldi smittölur áfram að lækka fram eftir viku er ekki loku fyrir það skotið að 1.000 áhorfendur geti verið í salnum á leikjunum sem er svo sannarlega betra en ekkert. Lanxess-Arena í Köln rúmar 19.500 áhorfendur í sæti.
Stefan Madsen, þjálfari Aalborg, er mættur til vinnu á ný eftir nokkurra daga sóttkví. Madsen verður þar með á hliðarlínunni í kvöld þegar Aalborg og Bjerringbro/Silkeborg mætast öðru sinni um danska meistaratitilinn í handknattleik karla. Arnór Atlason stýrði liðinu í fyrri leiknum á miðvikudaginn var í fjarveru Madsen. Leikurinn gekk að óskum og Aalborg vann, 37:34.
- Auglýsing -
