- Auglýsing -
- Díana Dögg Magnúsdóttir skoraði eitt mark í sex tilraunum þegar lið hennar BSV Sachsen Zwickau tapaði naumlega fyrir Oldenburg á heimavelli í gær í þýsku 1. deildinni í handknattleik, 28:27. Hún átti einnig fjórar stoðsendingar. Zwickau var fjórum mörkum yfir að loknum fyrri hálfleik, 14:10. Staðan var jöfn, 26:26, þegar hálf þriðja mínúta var til leiksloka. Oldenburg skoraði tvö mörk í röð áður en Díana og félagar klóruðu í bakkann í blálokin með 27. markinu. Zwickau er í 12. sæti af 14 liðum með fimm stig eftir 11 leiki.
- Andrea Jacobsen skoraði fimm mörk í átta skotum og var metin sem besti leikmaður Kristianstad þegar liðið tapaði á útivelli, 31:25, fyrir VästeråsIrsta HF í sænsku úrvalsdeildinni í gær. Kristianstad-liðið situr í 10. sæti af 12 liðum deildarinnar með átta stig eftir 10 leiki.
- Ekkert lát er á sigurgöngu Arons Kristjánssonar og leikmanna hans í landsliði Barein í Asíukeppninni í handknattleik sem stendur yfir í Sádi Arabíu þessa dagana. Barein vann Kúveit í gær, 29:15, í fyrstu umferð milliriðlakeppni mótsins. Þetta var fjórði sigur Bareina í jafnmörgum leikjum til þessa.
- Eftir að hafa skorað úr 37 skotum í röð á Evrópumótinu þá brást Dananum Emil Jakobsen þegar kom að 38. skotinu. Þá sá hinn gamalreyndi markvörður Króata, Mirko Alilovic, við Jakobsen.
- Dansk/færeyski handknattleiksmaðurinn Johan á Plogv Hansen hefur tekið sæti á ný í danska landsliðinu. Hansen tekur sæti dansk/íslenska hornamannsins Hans Lindberg sem smitaðist af covid í fyrradag. Hansen kom með danska landsliðinu til Ungverjalands 10. janúar en varð að draga sig í hlé vegna meiðsla í baki. Hann mun hafa jafnað sig bærilega og getur verið varamaður fyrir Lasse Svan í hægra horni.
- Auglýsing -
