- Auglýsing -
- Díana Dögg Magnúsdóttir og samherjar hennar í þýska 1. deildarliðinu BSV Sachsen Zwickau eru við æfingar hér á landi eftir því sem handbolti.is kemst næst. Meðal annars hefur liðið verið í Vestmannaeyjum en verður einnig í Reykjavík eftir helgina. BSV Sachsen Zwickau vann 2. deild í vor og býr sig undir að leika í efstu deild þýska handknattleiksins í fyrsta sinn í 25 ár og þykir því tilhlýðilegt að æfa í ferska loftinu á Íslandi fyrir átökin. Handbolti.is hefur borist til eyrna að jafnvel standi til að þýska liðið leiki æfingaleik við Val í vikunni.
- Viggó Kristjánsson og félagar í Stuttgart hafa einnig hafið undirbúning fyrir næsta keppnistímabil í þýska handknattleiknum. Þeir unnu í gær Sparkasse Schwaz Handball, 37:28, í æfingaleik.
- Portúgalski fjölmiðillinn O Jogo fullyrti í gær að Brasilíumaðurinn Rogerio Moraes, sem sagði óvænt upp samningi sínum við Veszprém á dögunum, hafi skrifað undir samning við Benfica í Portúgal. Sé þetta rétt þá er það enn ein rósin í hnappagat forráðamanna Benfica sem hafa styrkt lið sitt nokkuð á undanförnum vikum.
- Danski handknattleiksmaðurinn og blaðamaðurinn Rasmus Boyesen benti á þá skemmtilegu staðreynd að danska ungstirnið, Mathias Gidsel, hafi leikið 13 leiki á stórmóti með danska landsliðinu á ferlinum. Engum leikjanna hefur danska landsliðið tapað.
- Auglýsing -
