- Auglýsing -
- Íslandsmeistarar Vals mæta þýska liðinu Göppingen í 16-liða úrslitum Evrópudeildarinnar í handknattleik karla í Göppingen í kvöld. Flautað verður til leiks klukkan 18.45. Um er að ræða síðari viðureign liðanna. Göppingen vann fyrri leikinn með sjö marka mun, 36:29. Portúgölsku bræðurnir Roberto og Daniel Martins dæma leikinn í Göppingen.
- Norska landsliðskonan Henny Reistad hefur verið valin handknattleikskona ársins í Danmörku. Reistad sem er 24 ára gömul leikur með Esbjerg. Hún varð m.a. markahæst í dönsku úrvalsdeildinni á síðasta keppnistímabili með 246 mörk.
- Mannheimer Morgen segir frá því í gær að Rhein-Neckar Löwen hafi krækt í Króatann Ivan Martinovic leikmann Melsungen. Martinovic mun vera væntanlegur til Rhein-Neckar Löwen í sumar.
- Pólski fréttamiðillinn EM Kielce sagði frá því í gærkvöld að borgaryfirvöld í Kielce ætluðu að leggja handknattleiksliðinu Industria Kielce til jafnvirði 16 milljóna króna á næstu dögum. Það mun ekki vera nema sjötti hluti þess þess sem félagið óskaði eftir í aðstoð frá borginni. Industria Kielce glímir við mikinn fjárhagsvanda og alls óvíst hvað tekur við á næsta keppnistímabili. Hermt er í fréttinni að félagið neyðist til þess að selja tvo leikmenn á næstu dögum til þess að halda sjó ef ekki kemur til aukinn styrkur, frá borginni eða fyrirtækjum á næstu dögum.
- Í janúar tókst að bjarga Kielce-liðinu fyrir horn í nokkrar vikur meðan leitað væri frekari aðstoðar. Um leið var sagt frá því að í lok mars ætti að verða ljóst hvert framhaldið verði. Í frétt EM Kielce er sagt frá því að von sé á tilkynningu frá félaginu síðar í þessari viku.
- Serbneska liðið Vojvodina Novi Sad, sænska liðið Alingsås auk þeirra norsku, Nærbø IL og Runar eru komin í undanúrslit í Evrópubikarkeppninni í handknattleik karla. Norsku liðin mætast í undanúrslitum og Alingsås leikur gegn Vojvodina. Fyrri umferðin fer fram 15.og 16.apríl.
- Auglýsing -
