- Auglýsing -
- Kristján Örn Kristjánsson, Donni, skoraði tvö mörk í fjórum skotum fyrir PAUC þegar liðið tapaði fyrir Chambéry, 27:23, í frönsku 1. deildinni í handknattleik í gær. Þetta var annar leikur Donna með liðinu eftir að hann var frá keppni um nokkurt skeið eftir að hafa veikst af kórónuveirunni. Chambéry var með yfirhöndina í leiknum nánast frá upphafi til enda, m.a. 14:12 að loknum fyrri hálfleik. PAUC er í fimmta sæti deildarinnar en á tvo leiki inni á liðin fyrir ofan.
- Benedikt Marínó Herdísarson og Dagur Logi Sigurðsson, tveir ungir handknattleiksmenn fæddir 2003 og 2004, léku í fyrsta sinn með meistaraflokki Stjörnunnar í Olísdeildinni á mánudagskvöld þegar Stjarnan vann ÍR, 33:23, í TM-höllinni.
- Morten Stig Christensen, framkvæmdastjóri danska handknattleikssambandsins, segist ekki með nokkru móti skilja af hverju áhorfendur mega ekki mæta á handboltaleiki í landinu eftir að létt var að nokkru leyti á samkomutakmörkunum í Danmörku fyrr í vikunni. Á sama tíma og fólk má sækja tónleika, leikhús og kvikmyndahús mega áhorfendur ekki sækja handboltaleiki, segir Christensen í hugleiðingu sem hann ritaði og birtist í dönskum fjölmiðlum. Christensen segir ákvörðun danska þingsins vera óskiljanlega og verða enn óskiljanlegri þegar litið er til þess að krár standi nú nær öllum opnar.
- Luka Karabatic, fyrirliði franska stórliðsins PSG og leikmaður franska landsliðsins, hefur framlengt samning sinn við PSG til ársins 2024 eftir því sem franska íþróttablaðið L’Equipe greindi frá í gær.
- Auglýsing -
