- Auglýsing -
- Domagoj Duvnjak, fyrirliði THW Kiel, hefur framlengt samning sinn við félagið til ársins 2024. Duvnjak hefur verið í herbúðum þýska liðsins í sjö ár. Forráðamenn Kiel óttast hinsvegar að Sander Sagosen yfirgefi félagið þegar samningur hans rennur út vorið 2023.
- Hin efnilega sænska stórskytta, Elliot Stenmalm, hefur samið um að ganga til liðs við Vive Kielce í Póllandi. Ekki liggur fyrir hvort hann komi til pólska meistaraliðsins næsta sumar eða ári síðar. Stenmalm er 19 ára og leikur nú með Redbergslid.
- Bjartur Már Guðmundsson skoraði eitt mark fyrir StÍF þegar liðið tapaði, 36:29, á heimavelli fyrir VÍF frá Vestmanna í færeysku úrvalsdeildinni í handknattleik á laugardaginn. StÍF er í þriðja sæti deildarinnar með fimm stig eftir fimm viðureignir.
- Sama dag tapaði Neistin sem er undir stjórn Arnars Gunnarssonar fyrir Team Klaksvík, 35:32, í Klaksvík. Felix Már Kjartansson skoraði fimm af mörkum Neistans og Ágúst Ingi Óskarsson tvö mörk. Neistin er í sjötta sæti færeysku úrvalsdeildarinnar með tvö stig að loknum fjórum leikjum.
- Daníel Freyr Andrésson náði sér lítt á strik í markinu hjá Guif frá Eskilstuna þegar liðið tapaði með þriggja marka mun, 30:27, á útivelli fyrir HK Aranäs í sænsku úrvalsdeildinni á sunnudaginn. Aron Dagur Pálsson lék ekki með Guif að þessu sinni vegna meiðsla. Guif er í níunda sæti með sex stig eftir sex leiki.
- Orri Freyr Þorkelsson skoraði fimm mörk í einhverjum mesta markaleik sem sögu fara af í norskum handknattleik, alltént í meistaraflokki karla. Lið Orra Freys, Elverum, vann þá Runar Sanderfjord, 50:30, í átta lið úrslitum norsku bikarkeppninnar á sunnudaginn. Um er að ræða tvö efstu lið norsku úrvalsdeildarinnar. Markvörður Runar varði sitt fyrsta skot í leiknum á 55. mínútu.
- Elverum mætir Drammen í undanúrslitum 11. nóvember en liðin mættust einnig í undanúrslitum bikarkeppninnar á síðasta tímabili. Elverum vann þá viðureign með tveggja marka mun, 30:28.
- Óskar Ólafsson skoraði fimm mörk og Viktor Petersen Norberg fyrir Drammen þegar liðið vann Haslum í átta liða úrslitum á sunnudaginn, 36:21. Fjellhammer og ØIF Arendal eigast við í hinni viðureign undanúrslita í bikarkeppni karla í Noregi.
- Auglýsing -
