- Auglýsing -
- Egill Már Hjartarson skoraði þrjú mörk fyrir StÍF þegar liðið vann KÍF frá Kollafirði, 29:27, í fyrri undanúrslitaleik liðanna í færeysku bikarkeppninni í gærkvöld. Leikið var í Höllinni á Skála. Síðari viðureignin verður í Kollafirði á sunnudaginn og mun samanlagður sigurvegari leikjanna tveggja mæta annað hvort H71 eða VÍF frá Vestmanna í úrslitum keppninnar. VÍF krækti í jafntefli í fyrri leiknum í Vestmanna í gærkvöld, 22:22, með því að skora fjögur síðustu mörkin.
- Stefán Rafn Sigurmannson, leikmaður Hauka, var úrskurðaður í eins leiks keppnisbann á fundi aganefndar HSÍ í vikunni. Stefán Rafn hlaut útilokun með skýrslu á síðustu sekúndum viðureignar Hauka og Stjörnunnar í Olísdeild karla í síðustu viku.
- Leandra Náttsól Solvamoser, leikmaður HK, var einnig úrskurðuð í eins leiks bann á fyrrgreindum fundi aganefndar HSÍ. Hún var útilokuð í viðureign HK og Selfoss í Powerade– bikarnum í síðustu viku vegna „gáleysislegrar aðgerðar“ eins og það er orðað í fundargerð.
- Norska landsliðskonan Ragnhild Valle Dahl hefur samið við dönsku meistarana í Odense. Hún flytur á Fjón í sumar. Samningur hennar við Odense er til þriggja ára. Dahl leikur nú með Evrópumeisturum Vipers Kristiansand og var m.a. í sigurliði Noregs á EM kvenna í nóvember sl.
- Hans Lindberg leikur ekki með Füchse Berlin næstu vikurnar. Hann handarbrotnaði í leik með liðinu í Evrópudeildinni í vikunni. Forráðamönnum Füchse Berlin tókst að krækja í Austurríkismanninn Robert Weber rétt áður en frestur til félagaskipta í Þýskalandi rann út. Weber, sem er 37 ára gamall, lék árum saman í Þýskalandi en hefur í vetur verið liðsmaður Olympiakos í Grikklandi.
- Lindberg er 23 mörkum frá að slá markamet Yoon Kyung-shin í þýsku 1. deildinni. Óvíst er að Lindberg takist að bæta metið en samningur hans við Füchse Berlin rennur út í vor og þar með óvíst hvort hinn 41 árs gamli handknattleiksmaður verður áfram á mála hjá félagi í deildinni.
- Auglýsing -
