- Auglýsing -
- Einar Sverrisson og Tinna Sigurrós Traustadóttir eru handknattleikskarl og handknattleikskona hjá ungmennafélaginu Selfoss. Þau voru tilnefnd í kjöri til íþróttafólks Selfoss fyrir yfirstandandi ár. Einar er einn traustasti leikmaður karlaliðs Selfoss og sá markahæsti. Tinna Sigurrós var m.a. markadrottning Grill 66-deildar síðasta vor þegar Selfossliðið vann deildina. Einnig lék hún stórt hlutverk hjá U18 ára landsliði kvenna sem varð í áttunda sæti á HM í ágúst.
- Jessica Ryde, landsliðsmarkvörður Svía, hefur ákveðið að kveðja danska úrvalsdeildarliðið Ikast á næsta sumri og ganga til liðs við Nantes í Frakklandi. Samningur Ryde við Nantes er til þriggja ára.
- Franski leikstjórnandinn Kentin Mahé kvaddi höfuðstöðvar ungverska stórliðsins Veszprém fyrir jólaleyfi með því að skrifa undir eins árs framlengingu á samningi sínum með möguleika á öðru ári til viðbótar. Mahé hefur verið í herbúðum Veszprém í fjögur ár.
- Karlalandslið Rússlands og Hvíta-Rússlands hafa verið úti í kuldanum í alþjóðlegum handknattleik eftir innrás Rússa í Úkraínu í lok febrúar. Liðin mætast í tveimur vináttulandsleikjum í Moskvu 5. og 6. janúar. Velimir Petkovic landsliðsþjálfari Rússa hefur valið landsliðshóp til þess að taka þátt í leikjunum. Í rússneska landsliðshópnum eru tveir leikmenn sem leika með félagsliðum utan Rússlands og Hvíta-Rússlands, Viktor Kireev markvörður Füchse Berlin og Mikhail Vinogradov leikmaður Bregenz í Austurríki. Fyrsta æfing verður í Moskvu 27. desember.
- Sænski línumaðurinn Andreas Nillson hefur framlengt samning sinn við Veszprém til ársins 2025. Hann hefur verið hjá félaginu frá 2014. Nillson hefur ekki lyndað til Glenn Solberg landsliðsþjálfara Svíþjóðar og ekki verið með liðinu í síðustu verkefnum, s.s. á EM í fyrra. Nillson sagði á dögunum að hann reiknaði ekki með að leika oftar fyrir sænska landsliðið.
- Auglýsing -
