- Auglýsing -
- Elías Már Halldórsson fagnaði sigri með liði sínu, Fredrikstad Bkl., í gærkvöld í norsku úrvalsdeild kvenna. Fredrikstad Bkl. vann þá Oppsal á heimavelli, 24:21, eftir að hafa verið yfir, 12:9, að loknum fyrri hálfleik. Birta Rún Grétarsdóttir var ekki í leikmannahópi Oppsal-liðsins sem er í næst neðsta sæti með 9 stig eftir 22 leiki. Fredrikstad Bkl. fór upp um eitt stig, upp í áttunda sæti með sigrinum.
- Axel Stefánsson þjálfari Storhamar varð að sætta sig við tveggja marka tap á heimavelli fyrir Noregs- og Evrópumeisturum Vipers Kristiansand, 28:26. Storhamar er í öðru sæti norsku úrvalsdeildarinnar, fimm stigum á eftir Vipers.
- Línumaðurinn Youssef Ben Ali, landsliðsmaður Katar, verður samherji Kristjáns Arnar Kristjánssonar, Donna, hjá PAUC í Frakklandi á næsta keppnistímabili. Franska liðið sagði frá þessu í gær. Ben Ali leikur nú með Barcelona.
- Sænski handknattleiksmarkvörðurinn Evelina Eriksson sem sló í gegn með Vipers Kristiansand á síðasta keppnistímabili hefur samið við CSM Búkarest til tveggja ára. Samningur hennar tekur gildi í sumar. Eriksson var samherji Evu Bjarkar Davíðsdóttur leikmanns Stjörnunnar hjá Skuru IK í Svíþjóð frá 2018 til 2020.
- Þýska 2. deildarliðið HC Empor Rostock sem Hafþór Már Vignisson leikmaður Stjörnunnar samdi við á dögunum hefur framlengt samning við þjálfara liðsins, Till Wiechers, til ársins 2024. Wiechers hefur verið hjá félaginu í fimm ár.
- Auglýsing -
