- Auglýsing -
- Elías Már Halldórsson er kominn áfram í næstu umferð norsku bikarkeppninnar með lið sitt, Fredrikstad Bkl., eftir öruggan sigur á Reistad á útivelli í gærkvöld, 37:21. Fredrikstad Bkl. var sex mörkum yfir að loknum fyrri hálfleik, 17:11. Elías Már tók við þjálfun liðsins í vor eftir að hafa stýrt HK upp í Olísdeild karla.
- Birta Rún Grétarsdóttir var í leikmannahópi Oppsal sem komst áfram í næstu umferð norsku bikarkeppninnar með sigri á Bækkelaget, 25:16, á útivelli. Birta Rún skoraði ekki í leiknum. Hún er öll að ná sér eftir að hafa slitið krossband fyrir nærri ári.
- Ágúst Elí Björgvinsson, landsliðsmarkvörður og samherjar hans í KIF Kolding, féllu úr leik í dönsku bikarkeppninni í gærkvöld. Þeir töpuðu á útivelli fyrir Fredericia, 26:23, á útivelli í 16-liða úrslitum. Ágúst Elí varði 14 skot en stóð ekki nema hluta leiksins í marki liðsins. Þar að auki skoraði Hafnfirðingurinn eitt mark.
- Íslendingaliðið EHV Aue komst í gærkvöld í aðra umferð þýsku bikarkeppninnar í handknattleik með sigri á Potsdam, 28:26, á útivelli. Arnar Birkir Hálfdánsson skoraði ekki mark fyrir Aue en átti fjórar stoðsendingar. Sveinbjörn Pétursson stóð í marki liðsins í níu mínútur og varði þrjú skot. Færeyingurinn Áki Egilsnes sem kvaddi KA í sumar og gekk til liðs við Aue skoraði tvö mörk.
- ÍR-ingar og leikmenn Vængja Júpiters búa sig af kappi undir næsta keppnistímabil í Grill66-deildinni í handknattleik karla. Liðin leiddu saman hesta sína í æfingaleik í fyrrakvöld. ÍR hafði betur, 31:27.
- Auglýsing -
