- Auglýsing -
- Elías Már Halldórsson stýrði liði sínu, Fredrikstad Bkl., til sigurs á Aker á heimavelli, 34:32, í fimmtu umferð norsku úrvalsdeildar kvenna í handknattleik í gær. Fredrikstad er með fjögur stig í áttunda sæti deildarinnar.
- Sandra Erlingsdóttir skoraði þrjú mörk fyrir EH Aalborg þegar liðið tapaði á útivelli fyrir TMS Ringsted í dönsku 1. deildinni í handknattleik í gær. EH Aalborg er með tvö stig að loknum þremur leikjum. Liðið hefur tapað báðum leikjum sínum á útivelli.
- Steinunn Hansdóttir skoraði ekki fyrir Skanderborg Håndbold í gær þegar liðið vann Holstebro, 24:21, í úrvalsdeildinni í Danmörku. Skanderborg Håndbold situr áttunda sæti með fjögur stig eftir fimm leiki eftir tvo sigurleiki í röð.
- Áki Egilsnes tryggði EHV Aue jafntefli við ASV Hamm-Westfalen, 24:24, í þýsku 2. deildinni í gærdag. Áki jafnaði metin á síðustu sekúndu leiksins með eina marki sínu í leiknum. Arnar Birkir Hálfdánsson skoraði fjögur mörk fyrir Aue og átti einnig tvær stoðsendingar. Sveinbjörn Pétursson markvörður Aue kom lítið við sögu.
- Katrín Tinna Jensdóttir og félagar í Volda unnu Grane Arendal, 31:23, í norsku 1. deildinni í gær í fyrsta heimaleiknum í deildinni á leiktíðinni. Halldór Stefán Haraldsson er þjálfari Volda og Hilmar Guðlaugsson er aðstoðarþjálfari.
- Drammen er komið í þriðju umferð norsku bikarkeppninnar í handknattleik eftir stórsigur á Follo HK á heimavelli í gær, 38:25. Óskar Ólafsson skoraði fimm mörk fyrir Drammen og hinn hálf íslenski Viktor Petersen Norberg skoraði sex mörk.
- Ólafur Andrés Guðmundsson skoraði ekki mark fyrir Montpellier þegar liðið tapaði fyrir Nantes, 34:28, á útivelli í frönsku 1. deildinni í handknattleik í gær. Danski markvörðurinn Emil Nielsen varði afar vel í marki Nantes á sama tíma og markverðir Montpellier virtust miður sín.
- Auglýsing -
