- Auglýsing -
- Elín Jóna Þorsteinsdóttir og félagar í Ringköbing Håndbold töpuðu fyrir Århus United í Árósum í gær, 33:25. Ringköbing er í 13. og næst neðsta sæti með sex stig. Afar hörð keppni er á meðal sex liða í áttunda til 13. sæti deildarinnar og skilja aðeins þrjú stig að. Holstebro er hinsvegar án stiga í neðsta sæti. Elín Jóna varði átta skot, 22%.
- Eftir góðan sigur í vikunni þá töpuðu Steinunn Hansdóttir og samherjar í Skanderborg Håndbold fyrir Horsens Håndbold Elite, 30:22, á útivelli í dönsku úrvalsdeildinni í handknattleik í gær. Steinunn kom ekki mikið við sögu í leiknum. Hún átti eitt markskot sem geigaði. Skanderborg-liðið er í 11. sæti af 14 í deildinni með sjö stig eftir 11 leiki.
- Engum að óvörum var Hassan Moustafa endurkjörinn forseti Alþjóða handknattleikssambandsins á þingi sambandsins sem haldið var á fjarfundi í gær. Egyptinn, sem setið hefur í stóli formanns í 21 ár, fékk ekki mótframboð nú fremur en oftast áður. Andreas Michelmann, forseti þýska handknattleikssambandsins, reyndi að ná kjöri til embættis varaforseta en hafði ekki erindi sem erfiði. Frakkinn Joël Delplanque verður áfram einn varaforseta IFH. Hann vann Þjóðverjann með 106 atkvæði gegn 30.
- Hákon Daði Styrmisson, leikmaður Gummersbach, er markahæsti Íslendingurinn í þýsku 2. deildinni í handknattleik. Hann er í 15. sæti yfir markahæstu leikmenn deildarinnar með 48 mörk. Arnar Birkir Hálfdánsson, leikmaður EHV Aue, er í 21. sæti með 40 mörk. Dominik Mappes, leikmaður Hüttenberg, er efstur með 70 mörk.
- Auglýsing -
