- Auglýsing -
- Elliði Snær Viðarsson skoraði fimm mörk í fimm skotum, varði þrjú skot og stal boltanum einu sinni þegar lið hans, Gummersbach, vann GWD Minden á heimavelli í gærkvöld, 26:22. Hákon Daði Styrmisson skoraði tvisvar sinnum fyrir Gummersbachliðið sem Guðjón Valur Sigurðsson þjálfar. Liðið er í áttunda sæti með 11 stig eftir níu leiki. Minden rekur lestina án stiga.
- Arnar Freyr Arnarsson lét til sín taka og skoraði m.a. fjögur mörk þegar Melsungen lagði nýliða ASV Hamm-Westfalen 28:18 á útivelli í gærkvöld. Elvar Örn Jónsson skoraði einu sinni. Melsungen hefur komist á siglingu eftir að Elvar Örn mætti til leiks að loknum meiðslum. Liðið er komið í 10. sæti með átta stig eftir níu leiki.
- Grétar Ari Guðjónsson og félagar í Sélestat reka ennþá lestina í frönsku 1. deildinni í handknattleik. Sélestat tapaði í gærkvöld í heimsókn til Toulouse, 37:24. Grétar Ari varði þrjú skot.
- Jóhanna Lind Jónasdóttir hefur skrifað undir tveggja ára samning við handknattleiksdeild HK. Jóhanna Lind er hluti af efnilegum hópi stúlkna úr 3. flokki félagsins sem varð Íslandsmeistarar í vor eftir sigur á Haukum í úrslitaleik.
- Evrópu- og heimsmeistarar Noregs í handknattleik kvenna steinlágu fyrir hollenska landsliðinu í fyrstu umferð alþjóðlegs móts í Stavangri í gærkvöld, 33:24. Nora Mørk skoraði sex mörk fyrir norska landsliðið en Angela Malestein sjö fyrir Holland. Vika er í dag þangað til Evrópumót kvenna hefst.
- Danska landsliðið fór létt með landslið Brasilíu í hinum leik mótsins í Stavangri, 34:22. Mótinu verður framhaldið á laugardag og sunnudag.
- Færeyski landsliðsmaðurinn og hægri hornamaðurinn Hakun West av Teigum er sagður vera undir smásjá Füchse Berlin í leit þess að eftirmanni Hans Lindberg sem fær ekki nýjan samning á næsta sumri, eins og handbolti.is sagði frá fyrr í vikunni. West av Teigum leikur um þessar mundir með Skanderborg Aarhus. Hann er talinn henta þýska liðinu vel með Svíanum Valter Chrintz sem þegar er samningsbundinn Berlínarliðinu til ársins 2026.
- Auglýsing -
