- Auglýsing -
- Elvar Örn Jónsson skoraði fjögur mörk og gaf sjö stoðsendingar í 13 marka sigri MT Melsungen á HC Erlangen, 31:18, á heimavelli í þýsku 1. deildinni í handknattleik í gær. Arnar Freyr Arnarsson skoraði eitt mark og var einu sinni vísað af leikvelli. Arnar Freyr er liðsfélagi Elvars Arnar hjá Melsungen sem er í 9. sæti með 26 stig. Ólafur Stefánsson er aðstoðarþjálfari HC Erlangen sem er í næsta sæti á eftir Melsungen.
- Leipzig hefur átt erfitt uppdráttar eftir að Viggó Kristjánsson meiddist alvarlega fyrir nokkrum vikum. Liðið hefur varla unnið stig síðan. Í gær tapaði Leipzig á heimavelli fyrir Stuttgart, 30:25. Rúnar Sigtryggsson er þjálfari Leipzig-liðsins sem er komið í 12. sæti með 24 stig eftir 27 leiki.
- Sveinn Jóhannsson skoraði eitt mark og var einu sinni vísað af leikvelli þegar lið hans GWD Minden tapaði óvænt fyrir neðsta liði þýsku 1. deildarinnar í handknattleik, ASV Hamm, 31:26, á heimavelli Hamm í gær. GWD Minden tapaði mikilvægu stigi í fallbaráttu deildarinnar. Liðið er í næst neðsta sæti með 11 stig, Hamm hefur sjö stig í neðsta sæti. Wetzlar er í þriðja neðsta sæti með 13 stig en hefur leikið einum leik fleira en Minden.
- Janus Daði Smárason skoraði sex mörk og Sigvaldi Björn Guðjónsson fjögur mörk þegar Kolstad vann nauman sigur á Halden, 26:25, í síðari leik liðanna í átta liða úrslitum norsku úrvalsdeildarinnar í gær. Eftir 14 marka sigur í fyrri leiknum þá áttu leikmenn Kolstad í meiri erfiðleikum með Haldenliðið í gær. Janus Daði bar Kolstadliðið upp á köflum í leiknum, ekki síst í fyrri hálfleik.
- Auk Kolstad eru Nærbø og Runar Sandefjord komin í undanúrslit. Elverum og Fjellhammer eigast við í oddaleik á sunnudaginn um fjórða sætið í undanúrslitum.
- Lærisveinar Halldórs Jóhanns Sigfússonar í TTH Holstebro töpuðu á heimavelli fyrir Mors-Thy, 24:22, í annarri umferð umspils fimm neðstu liða dönsku úrvalsdeildarinnar í gær. Holstebro er í öðru sæti umspilsins með þrjú stig. Mors-Thy er efst með fimm stig.
- Auglýsing -
