- Auglýsing -
- Elvar Ásgeirsson lék afar vel fyrir Nancy sem krækti í langþráð stig á útivelli í heimsókn sinni til Nimes, 29:29, í frönsku 1. deildinni í handknattleik. Úrslitin eru ekki síst athyglisverð fyrir þá staðreynd að Nancy er með sex leikmenn á sjúkraskrá um þessar mundir. Elvar var maður leiksins hjá Nancy. Hann skoraði átta mörk í 11 skotum, átti sjö stoðsendingar og vann eitt vítakast. Þá var hann fastur fyrir í vörninni. Nancy rekur lestina í deildinni með fimm stig þegar liðið á 11 leiki eftir.
- Stórleikur Grétars Ara Guðjónssonar dugði Nice því miður ekki í gærkvöld þegar það fékk efsta lið frönsku 2. deildarinnar, Ivry, í heimsókn. Grétar Ari varði 18 skot og var með 38% hlutfallsmarkvörslu í sjö marka tapi, 30:23. Nice situr í fimmta sæti 2. deildar með 23 stig að loknum 20 leikjum. Ivry, sem féll úr 1. deild í vor sem leið, er með yfirburði og hefur 11 stiga forskot á Pontault sem er í öðru sæti.
- Austurrísku meistararnir Alpla Hard, undir stjórn Hannesar Jóns Jónssonar, töpuðu í gærkvöld fyrir Krems í uppgjöri tveggja efstu liða deildarinnar, 25:22. Leikið var á heimavelli Krems. Alpla Hard er þar með fallið af toppi deildarinnar niður í annað sæti. Liðið er stigi á eftir Krems en á leik til góða.
- Ekkert varð af leik Dormagen og Gummersbach, sem Elliði Snær Viðarsson leikur með og Guðjón Valur Sigurðsson þjálfar, í þýsku 2. deildinni sem fram átti að fara í gærkvöld. Meira en helmingur af 20 leikmönnum Dormagen fengu ekki grænt ljós frá lækni liðsins til þess að taka þátt í leik. Kórónuveiran hefur leikið menn grátt í herbúðum Dormagen upp á síðkastið. Reynt verður að koma leiknum á dagskrá svo fljótt sem auðið verður, sagði í tilkynningu félaganna í gærkvöld.
- Alfreð Gíslason, landsliðsþjálfari Þýskalands í handknattleik karla, hefur valið 19 leikmenn til æfinga sem hefjast 14. mars og til tveggja vináttulandsleikja við Ungverja í Gummersbach 19. mars og daginn eftir í Kassel. Handknattleikssamband Evrópu staðfesti í gær að þýska landsliðið mætir færeyska landsliðinu í umspilsleikjum um HM sæti upp úr miðjum apríl.
- Auglýsing -
