- Auglýsing -
- Erlingur Richardsson þjálfari karlaliðs ÍBV og hollenska karlalandsliðsins verður fyrirlesari ásamt vöskum hópi þjálfara á þjálfaranámskeiði í Sandefjord í Noregi 10. – 12. júní. Auk Erlings verða m.a. Þórir Hergeirsson, þjálfari heimsmeistara Noregs í handknattleik kvenna, Glenn Solberg, þjálfari Evrópumeistara Svíþjóðar í handknattleik karla, Jordi Ribera, landsliðsþjálfari karlaliðs Spánar og Nikolaj Jacobsen þjálfari heimsmeistara Dana í handknattleik karla.
- Ranglega var sagt frá því í frétt handbolta.is á laugardaginn að tvöföld umferð væri leikin í umspili neðstu liðanna í dönsku úrvalsdeildinni í handknattleik og þar af leiðandi hafi sigur Elínar Jónu Þorsteinsdóttur og félagar í Ringköbing á liði Randers haldið lífi í vonum liðsins um að halda sæti sínu í deildinni. Hið rétt er að einföld umferð er leikin í fimm liða umspili.
- Ringköbingliðið er þar með á botninum eftir umspilið og leikur við TMS Ringsted í tvígang um áframhaldandi veru í úrvalsdeildinni. TMS Ringsted lék í næstu efstu deild á tímabilinu og vann umspilskeppnina þar, sem veitti liðinu rétt á að skora Elínu Jónu og samherja á hólm um úrvalsdeildarsætið.
- Hinn þrautreyndi þýski þjálfari Michael Biegler hefur níu líf í þjálfuninni. Í gær var hann ráðinn þjálfari Ludwigshafen í þýsku 2. deild karla. Bielger hefur víða komið við á sínum ferli og þjálfað félagslið og landslið kvenna- og karla. Síðast var Biegler þjálfari karlalandsliðs Úkraínu en lét af störfum að loknu Evrópumótinu í janúar. Ludwigshafen er í 12. sæti 2. deildar af 20 liðum.
- Austurríski hornamaðurinn Raul Santos flytur heim í sumar og gengur til liðs við BT Füchse Auto Pichler. Santos hefur verið árum saman í Þýskalandi og leikið þar með Kiel, Leipzig og Gummersbach þar sem hann lýkur tímabilinu. Gummersbach er einnig fyrsta liðið sem Santos gekk til liðs við við komuna til Þýskalands fyrir níu árum.
- Althea Reinhardt sem verið hefur annar af tveimur landsliðsmarkvörðum Dana um árabil varð að draga sig út úr landsliðinu um helgina. Reinhardt hefur af og til fundið fyrir hjartsláttartuflunum og hafði verið góð um nokkurt skeið þar til á dögunum að þær fóru að gera vart við sig á ný. Anna O. Kristensen, markvörður Viborg, var kölluð inn í landsliðið í stað Reinhardt. Danska landsliðið býr sig undir tvo síðustu leikina í undankeppni EM sem fram fara í vikunni, gegn Austurríki og Færeyjum.
- Auglýsing -
