- Auglýsing -
- Norska handknattleikskonan Nora Mørk veður í norska landsliðinu sem um næstu helgi tekur þátt í forkeppni Ólympíuleikanna. Leikirnir í riðli norska landsliðsins fara fram í Podgorica í Svartfjallalandi. Mørk hefur ekki jafnað sig á meiðslum í hné sem hún varð fyrir í byrjun febrúar. Engu að síður verður hún í norska landsliðinu um komandi helgi. Hennar hlutverk verður aðeins eitt, að koma inn á leikvöllinn til þess að taka vítaköst.
- Toyota Gosei Blue Falcon varð á sunnudaginn japanskur meistari í handknattleik karla í fyrsta sinn. Liðið vann Toyota Auto Body, 28:24, í úrslitaleik. Toyota Gosei Blue Falcon var stofnað 1975 og hefur leikið í efstu deild japanska handknattleiksins í 15 ár.
- Serbneski handknattleiksmaðurinn Marko Vujin hefur gengið til liðs við Pick Szeged í Ungverjalandi og að leysa af Króatann Luka Stepancic sem er meiddur. Vujin gekk á dyr hjá Vardar Skopje fyrir um mánuði þegar sauð upp úr á milli hans og þjálfarans. Vujin þótti hann vera afskiptur og fá ekki þau tækifæri sem honum þótti hann verðskulda hjá Vardar. Ekki eru allir stuðningsmenn Pick Szeged sáttir við komu Vujin til félagsins. Serbinn mun hafa sýnt af sér mikinn dónaskap þar í kappleik fyrir fáeinum árum í beinu framhaldi af að hafa kastað viljandi að margra mati í höfuð þáverandi markvarðar Pick Szeged í vítakasti.
- Spánverjinn Eduardo Gurbindo sem nú leikur með Nantes og markvörðurinn Martin Tomovski sem nú leikur með Ludwigshafen, er sagðir ganga til liðs við Vardar Skopje í sumar.
- Lasse Møller leikur ekki með Flensburg næstu vikurnar vegna meiðsla í hné. Hann meiddist á æfingu danska landsliðsins í síðustu viku. Um er að ræða sömu meiðsli og héldu Møller frá keppni í nærri þrjá mánuði í haust og í vetur.
- Auglýsing -
