- Auglýsing -
- Spænski handknattleiksmaðurinn David Fernandez sem leystur var undan samningi hjá Wisla Plock í nýliðinni viku hefur samið við FC Porto. Carlos Resende tók við þjálfun FC Porto á dögunum eftir að Svíinn Magnus Andersson var leystur frá störfum. Resende mun hafa lagt áherslu á að fá Fernandez til félagsins.
- Línumaðurinn Simon Hald hefur gengið til liðs við Aalborg eftir að hafa leikið með Flensburg síðustu fjögur ár. Samningur Hald við Álaborgarliðið er til fimm ára. Hald hefur átt fast sæti í danska landsliðinu undanfarin ár og á m.a. þrenn gullverðlaun frá heimsmeistaramótum.
- Danski handknattleiksmaðurinn Benjamin Jakobsen hefur verið leystur undan samningi við Aalborg Håndbold að eigin ósk. Hann hefur í hyggju að ganga til liðs við Sporting í Lissabon og verða m.a. liðsfélagi Orra Freys Þorkelssonar. Eftir að Simon Hald samdi við Aalborg var ljóst að leiktími Jakobsen minnkaði verulega.
- Ungverska handknattleiksliðið FTC sem tapaði fyrir Vipers í úrslitum Meistaradeildar kvenna í handknattleik í vor hefur endurnýjað samninga við sex leikmenn. Þær eru Andrea Lekic, Dragan Cvijic, Julia Harsfalvi, Kinga Janurik, Anett Kisfaludy og Szandra Szöllösi-Zacsik. Daninn Martin Albertsen tók nýverið við þjálfun FTC eftir að hafa verið landsliðsþjálfari Sviss um árabil.
- Auglýsing -
